ఇల్లే కిలోమీటరు!

ఇల్లెంతుంటుంది...? ఏ రెండొందల గజాలో, మూడొందల గజాలో ఉంటుంది... అపార్ట్‌మెంట్‌ ఎంతుంటుంది... ఇంకాస్త పెద్ద స్థలంలో ఉంటుంది... మరి ఓ కిలోమీటరుపైనే ఉండే ఇల్లు ఎప్పుడైనా చూశారా?

ప్రపంచంలోనే ఒకే కప్పు కింద ఉన్న అతి పెద్ద నివాస సముదాయం ఏంటో తెలుసా? కార్ల్‌ మార్క్స్‌ హాఫ్‌. ఆస్ట్రియా రాజధాని వియన్నాలో ఉంది.
* దీన్ని 1927, 1930ల మధ్యలో కట్టారు. అప్పట్లో వియన్నా సోషల్‌ డెమోక్రటిక్‌ పార్టీ ఆఫ్‌ వియన్నా అధీనంలో ఉండేది. ప్రజల నుంచి ప్రత్యేకమైన పన్నును తీసుకుని మరీ దీన్ని నిర్మించారు.
* మొదటి ప్రపంచ యుద్ధం తర్వాత వేల మందికి ఇళ్లు లేకుండా పోయాయి. వాళ్లందరికీ నివాసాలు కల్పించాలనే ఉద్దేశంతో దీన్నిలా పెద్దగా కట్టేశారు. ఇదే చివరికి ప్రపంచంలోనే అతి పొడవైన నివాస సముదాయం అయిపోయింది. లోపల అపార్ట్‌మెంట్లు దేనికవే విడిగా ఉన్నా అన్నీ ఈ భవనంలోనే ఉంటాయన్నమాట.
* దీంట్లో దాదాపుగా 13 వందలకుపైగా అపార్ట్‌మెంటులున్నాయి. ఐదు వేల మందికి ఇళ్లు కల్పించాలనే ఉద్దేశంతో దీన్ని నిర్మించార్ట.
* ఇది ఏకంగా 1100 మీటర్ల పొడవుంటుంది. అంటే కిలోమీటరుపైనే మరి. మొత్తం భవనాన్నంతా ఒకే ఫొటోలో మనం చూడలేం కూడా.
* ఈ ఒక్క భవనం నుంచి వెళ్లేలోపే ట్రామ్‌ నాలుగు సార్లు ఆగుతుంది. అంటే దీని పొడవెంతో మనమే అర్థం చేసుకోవచ్చు.
* ఈ భవనంలోనే కొన్ని ఆఫీసులు, లాండ్రీ, ఆసుపత్రులు, చిన్న పిల్లలకు నర్సరీల్లాంటివీ ఉన్నాయి.
* ఇప్పుడు ఇది సినిమా షూటింగ్‌లకూ ప్రసిద్ధి. 1990ల్లో ఇది పాడైపోయేసరికి మళ్లీ మరమ్మతులు చేశారు. ఇప్పటికీ ఉపయోగిస్తున్నారు. భలే నివాసాలేనే!