ఈఫిల్‌ టవర్లు వరుస కట్టాయ్‌!

అంతెత్తునుండే ఈఫిల్‌ టవర్‌ అంటే మనకు భలే ఇష్టం... మరి అలాంటివి ఒక్కచోటే బోలెడు కనిపిస్తే... అబ్బ చూసేందుకు భలే ముచ్చటగా ఉండదూ! ఆ దృశ్యాన్ని చూడాలంటే మనం వియత్నాం వెళ్లాల్సిందే... రండి మరి బయలుదేరేద్దాం! అసలే సముద్రం...

ఆ మధ్యలో ఈఫిల్‌ టవర్లు... ఒకటి కాదు... రెండు కాదు... మొత్తం ఏడు... దర్జాగా నిలబడి ఉంటాయ్‌. అంతటితో వింత పూర్తి కాలేదు. ఆ ఈఫిల్‌ టవర్ల మీదుగా ఓ కేబుల్‌ కార్ల లైను వెళుతుంటుంది. ఇదంతా చూసేందుకు భలే తమాషాగా ఉంటుంది. అందుకే పర్యటకులకు ఈ కేబుల్‌ కార్లలో ప్రయాణించడం అంటే ఎక్కడ లేని ఇష్టం. పై నుంచి సముద్రాన్ని, ఆపైనున్న ఈ బుల్లి ఈఫిల్‌ టవర్లను చూసేస్తూ తెగ సంబరపడిపోతుంటారు.
* ఈ ఈఫిల్‌ టవర్ల కేబుల్‌ కార్‌ లైను ఇంతకీ ఎక్కడుందో చెప్పలేదు కదూ. వియత్నాంలోని కన్హా హోవా ప్రావిన్సులో. అక్కడ హాన్‌ ట్రె ద్వీపం నుంచి నా ట్రంగ్‌ల మధ్య సముద్రంలో ఉంటుందిది.
* సముద్రంలో దాదాపుగా 3,320 మీటర్ల దూరం ఈ లైను ఉంది.
* ఇక్కడున్న ఈ టవర్లన్నీ 95 నుంచి 157 మీటర్ల వరకూ ఎత్తుల్లో ఉన్నాయి.
* ప్రపంచంలోనే సముద్రం మీదున్న పొడవైన కేబుల్‌ కార్ల లైనుగా దీనికి రికార్డులూ ఉన్నాయి.
* అసలు విషయం ఏంటంటే ఈ కేబుల్‌ కార్ల లైను ఏర్పాటులో భాగంగా మధ్యలో వేసే స్తంభాల్నే ఇలా ఈఫిల్‌ టవర్ల ఆకారంలో నిర్మించారన్నమాట. వీటికి ఒక్కోదానికీ కింద మళ్లీ నాలుగు స్తంభాలుంటాయి. అవే వీటినిలా నీళ్లలో నిలబెట్టి ఉంచగలుగుతాయి. అయితే వీటివల్లే ఈ లైనుకు ఎంతో గుర్తింపు వచ్చేసింది. ఇక్కడ పర్యటకమూ పెరిగింది.
* ఈ దేశానికి సంబంధించిన రెండు సంస్థలు పన్నెండు నెలల్లోనే దీన్ని నిర్మించేశాయిట. మొత్తానికి భలే టవర్లే కదూ!