వీరు కదిలితే.. వారికి వేణ్ణీళ్లు!

నీటిని ఎలా వేడి చేస్తాం? ‘ఏముంది? గీజర్‌లోనో లేదంటే పొయ్యి మీద పెట్టో’ అనేస్తాం.. మరేమో ఓ చోటు మాత్రం ఇందుకు భిన్నం... ఎందుకంటే?
నీరు వేడవ్వడానికి వేడి అవసరం కదా. అది ఇటు కరెంటు నుంచైనా రావాలి. అటు పొయ్యి మంట నుంచైనా అందాలి. కానీ ఓ దగ్గర మాత్రం మనుషుల కదలికల నుంచి వస్తోంది. వారి నుంచి వచ్చే ఉష్ణమే నీటిని వేడి చేసేస్తోంది.
* అదెక్కడంటే స్వీడన్‌ రాజధాని స్టాక్‌హోం తెలుసుగా. అక్కడ ‘స్టాక్‌హోం సెంట్రల్‌ స్టేషన్‌’ అని ఉంది. అక్కడే ఈ గమ్మత్తయిన పని జరుగుతోంది.
* ఆ రైల్వే స్టేషన్‌ ఎప్పుడూ రద్దీగానే ఉంటుంది. రోజుకు రెండున్నర లక్షల మందికి పైగా ఇక్కడి నుంచి రాకపోకలు సాగిస్తుంటారు. అలా అక్కడ మనుషులు కదలడం, సామాన్లు లాక్కెళ్లడం, అల్పాహారం తినడంలాంటి చాలా పనులు చేస్తుంటారు. ఆ పనులన్నింటి వల్ల అక్కడ ఉష్ణం పుడుతుంది. ఈ పనుల వల్ల అక్కడే కాదు ఎక్కడైనా కొంత వేడి పుడుతుంది. అందుకే మనుషులు ఎక్కువగా ఉన్న చోట ఉక్కబోత మనకూ అనుభవమే.
* జనాల నుంచి ఉత్పన్నమయ్యే వేడిని మామూలుగా ఎగ్జాస్ట్‌లను ఉపయోగించి బయటకు పంపించేస్తారు. అయితే ఈ రైల్వే స్టేషన్లో చేస్తున్నదేమిటంటే? ఇక్కడి వెంటిలేషన్‌ విధానం కాస్త భిన్నంగా ఉంది. ఆ వేడిని అది లాక్కుని ఆ భవనం కిందున్న ట్యాంకుల్లోని నీటిపైకి మళ్లిస్తుంది. దీంతో ఆ నీరు క్రమంగా వేడెక్కుతుంది.
* అలా వచ్చిన వేడి నీళ్లే ఆ పక్కన ఉన్న పదమూడు అంతస్తుల భవనమంతా సరఫరా చేస్తారు.
* ఇంత కష్టం ఎందుకంటే స్వీడన్‌లో విద్యుత్‌ ఛార్జీలు అధికం. పైగా అక్కడ శీతకాలం విపరీతమైన చలి ఉంటుంది. దీంతో అంతా వేడి నీటినే ఎక్కువగా ఉపయోగిస్తుంటారు. అందుకే ఇక్కడ ఈ విధానం బాగా ఉపయోగపడుతోంది. మామూలుగా వేడి నీటిని తయారు చేసుకునే ఖర్చులో పావుశాతం డబ్బులకే ఈ విధానంలో వేడి నీళ్లు తయారైపోతున్నాయి. అందుకే స్వీడన్‌ ఇంజినీర్లు ఈ అద్భుతమైన ఐడియాను ఆచరణలో పెట్టగలిగారు. ఐడియా అదిరిపోలా!