పండు పండు.. చాక్లెట్‌ పండు!

‘పండేంటి?... చాక్లెట్‌ ఏంటి?’ అని తెగ ఆలోచిస్తున్నారు కదూ ఫ్రెండ్స్‌. అవును.. పండే చాక్లెట్‌ ఫ్లేవర్‌లో ఉంటుంది. ‘హుర్రే.. భలే.. భలే.. చాక్లెట్లు తింటే ఇంట్లో అమ్మానాన్నలు తిడతారు. ఇప్పుడిక ఎంచక్కా ఈ పండు తినేయొచ్చు’ అనుకుంటున్నారేమో. ప్చ్‌...! మనకు ఆ అదృష్టం లేదు. ఎందుకంటే ఈ పండు మన దగ్గర దొరకదు. ‘మరి ఎక్కడ దొరుకుతుంది? ఇంతకీ ఈ పండేంటి? దీని పేరేంటి?’ అని ఇలా బోలెడన్ని ప్రశ్నలు అడగాలనుకుంటున్నారు కదూ! ఈ కథనం చదవండి చాలు. మీ అనుమానాలన్నీ ‘హుష్‌.. కాకి’ అయిపోతాయ్‌!

ఈ తియ్యటి పండు పేరు.. డయాస్‌ పిరాస్‌ నిగ్రా.. పలకడానికి ఇబ్బందిగా ఉంది కదూ! దీన్నే బ్లాక్‌ సపోట్‌, బ్లాక్‌ సోప్‌ఆపిల్‌, చాక్లెట్‌ పుడ్డింగ్‌ ఫ్రూట్‌ అనీ పిలుస్తారు. ఈ పండ్ల చెట్లు ఎక్కువగా మధ్య అమెరికా, మెక్సికో, కొలంబియాలో కనిపిస్తాయి.

నిత్యం పచ్చగా...

ఈ చెట్లు దాదాపు 25 మీటర్ల వరకు పొడవు పెరుగుతాయి. ఇవి ఎప్పుడూ చెట్టు నిండా ఆకులతో పచ్చగా కళకళలాడుతుంటాయి. ఈ మొక్కలు నాటిన మూడు నుంచి నాలుగు సంవత్సరాల తర్వాత కాయలు కాస్తాయి.

టొమాటో ఆకారంలో..

ఈ బ్లాక్‌ సపోట్‌ పండు చూడటానికి టొమాటో కాయ ఆకారంలో ఉంటుంది. ఒక్కో కాయ 5 నుంచి 10 సెంటీమీటర్ల పరిమాణం వరకు పెరుగుతుంది. ఈ కాయ ముందు ఆకుపచ్చ రంగులో ఉండి.. పండినప్పుడు ముదురు రంగులోకి మారుతుంది. కాయగా ఉన్నప్పుడు లోపలి గుజ్జు తెల్లగా ఉంటుంది. పక్వానికి వచ్చాక డార్క్‌ చాక్లెట్‌ రంగులోకి మారుతుంది.

డజను విత్తనాలు..  

ఈ చాక్లెట్‌ పండులో 12 విత్తనాలుంటాయి. వీటిల్లో కొన్ని విత్తనాలు లేని రకాలూ ఉన్నాయి. ఈ పండ్లు పక్వానికి వచ్చాక ఎంత తియ్యగా ఉంటాయో.. పండకముందు అంత చేదుగా ఉంటాయి. ఈ చెట్టు మొదట చాలా నెమ్మదిగా పెరుగుతుంది. ఓ నాలుగైదు సంవత్సరాల తర్వాత కాస్త వేగంగా పెరుగుతుంది.

ఎన్నెన్నో లాభాలు!

ఈ చాక్లెట్‌ ఫ్రూట్‌ను ఆహారంగా తీసుకుంటే ఎన్నో ప్రయోజనాలుంటాయట. క్యాన్సర్‌, గుండెజబ్బులు, పక్షవాతం రాకుండా కాపాడుతుందట. ఇందులో దాదాపు ఆరెంజ్‌లో ఉన్నంత పరిమాణంలో విటమిన్‌- సి దొరుకుతుంది. ఫైబర్‌, పొటాషియం కూడా సమృద్ధిగా లభిస్తుంది. జీర్ణశక్తిని పెంచుతుంది. కంటి చూపును కూడా మెరుగు పరుస్తుందట. అంతెందుకు ఇమ్యూనిటీని పెంచుతుందట. ఈ కరోనా కాలంలో వ్యాధినిరోధక శక్తి చాలా అవసరం కదూ! మొత్తానికి ఇవీ ఫ్రెండ్స్‌ చాక్లెట్‌ పండు విశేషాలు.

• Fruit
•  chocolate fruits
• Health