పప్పీకి బహుమతిగా ఇల్లు!

హలో ఫ్రెండ్స్‌.. ఎవరినైనా తిట్టాలంటే.. ‘కుక్క బతుకు’ అనే పదం వాడుతుంటారు. ‘కుక్క చావు’, ‘సింహాసనం మీద కుక్కను కూర్చోబెట్టినట్టు’ లాంటి పదాలూ వింటుంటాం. కానీ, ఈ కుక్క గురించి విన్నారంటే.. ‘ఆహా.. బతుకంటే కుక్కదే..’ అనుకుంటాం.. మరి, ఆ విశేషాలేంటో తెలుసుకుందామా..!

అమెరికాలోని కాలిఫోర్నియాకు చెందిన బ్రెంట్‌ రెవిరా అనే అన్నయ్య ఓ యూట్యూబర్‌. అయితే, తన పప్పీ ‘చార్లీ’ పుట్టినరోజు సందర్భంగా రూ.16లక్షలతో ఏకంగా దానికో ఇల్లే కట్టించి ఇచ్చాడట. దానికి సంబంధించిన వీడియోను సోషల్‌ మీడియాలో అప్‌లోడ్‌ చేయడంతో ఇటీవల వైరల్‌గా మారింది.

అన్ని సౌకర్యాలు..

పప్పీ కోసమే కదా అని.. ఆ ఇంటిని అదేదో సాదాసీదాగా కట్టించలేదు నేస్తాలూ.. అందులో ఓ టీవీ, సోఫాసెట్‌, బీన్‌బ్యాగులు, కాఫీ టేబుల్‌, బెడ్‌తోపాటు ఇంటి వెనక వరండా కూడా ఉందట. అంతేకాదు.. దానికి ఇష్టమైన ఆహార పదార్థాలు కూడా అక్కడే ఉండేలా ఓ ఫ్రిజ్‌ కూడా ఏర్పాటు చేశాడు. అలాగే ఆ టీవీలో చార్లీకి నచ్చిన అంశాలే ఎప్పటికీ ప్లే అయ్యేలా సెట్‌ చేశాడట ఆ అన్నయ్య. ఎంచక్కా సోఫాలో కూర్చొని, టీవీ చూసుకుంటూ ఆ పప్పీ గడిపేయొచ్చన్నమాట.

పప్పీ ఆశ్చర్యం..

ఆ ఇల్లు మొత్తం పూర్తి చేసి చార్లీని అందులోకి తీసుకెళ్లగానే, అది ఎంతో సంతోషించిందట. పుట్టినరోజు బహుమతిగా ఇంటితోపాటు ఓ చిన్న పప్పీని కూడా అందించాడట ఆ అన్నయ్య. దాన్ని చూడగానే చార్లీ ఎగిరి గంతేసినంత పని చేసిందట. ఇంకో విశేషం ఏంటే.. ఆ ఇంటి బయట బంగారు పూత పూసిన అక్షరాలతో ‘చార్లీస్‌ డాగ్‌ హౌస్‌’ అని కూడా రాయించాడట. ఈ వీడియో చూసిన నెటిజన్లంతా రకరకాలుగా స్పందిస్తున్నారు. కొందరేమో కుక్క వైభోగాన్ని పొగుడుతుంటే.. ఇంకొందరేమో ఆ అన్నయ్యను అభినందిస్తున్నారు. నేస్తాలూ.. మొత్తానికి ఈ పప్పీ ఇల్లు భలే ఉంది కదూ!