ఆటాడేద్దామా!

ఆట

అబ్బ.. ఇంట్లోనే ఖాళీగా ఉంటే బోరు కొట్టేస్తుంది కదూ... అయితే ఒక కొత్త ఆట నేర్చుకుందామా? ఆడటమూ చాలా అంటే చాలా సులువే... చదివేసి హాయిగా ఆడేయండి!

కావాల్సినవి:
ఇంట్లో ఉన్న వస్తువులే. పుస్తకాలు, బంతి, గుండీలాంటి గుండ్రటి వస్తువులు, త్రిభుజాకారంలో కత్తిరించుకున్న కాగితపు ముక్కల్లాంటివి, కాగితాలు, పెన్సిల్‌, గడియారం

ఎలా ఆడాలంటే?
* ఇద్దరి నుంచి ఎంతమందైనా ఆడొచ్చు.
* పైన చెప్పిన వస్తువులన్నింటిని ఒక చోట ఉంచాలి.
* ఓ నాలుగు కాగితాలు తీసుకుని పెన్ను లేదా పెన్సిల్‌తో వాటిపై ఒక చతురస్రం, దీర్ఘచతురస్రం, వృత్తం, త్రిభుజాల్ని గీయాలి. ఇదంతా ఒక సెట్టు. ఎంతమంది ఆడితే అన్ని సెట్టులు తయారు చేసి పెట్టుకోవాలి.
* ఇంకేముంది.... టైం పెట్టుకుని వన్‌.. టూ.. త్రీ.. అందరూ ఆ కాగితాల్ని పట్టుకుని సిద్ధంగా ఉండాలి.
* నిర్ణీత సమయంలో ఇందాక చెప్పినట్టు ఒక దగ్గర ఉంచిన వస్తువుల్లోంచి ఒక్కోటి తీసుకోస్తూ కాగితాలపై ఉన్న గుర్తుల్ని బట్టి సర్దాలి.
* ఎవరు ఎక్కువగా సరిగ్గా ఆ వస్తువుల్ని గుర్తుల దగ్గర పెడతారో వారే విజేత!