యాత్ర చేయొచ్చు... కానీ!

ధర్మ సందేహం

సంవత్సర సూతకం ఉన్నవాళ్లు తీర్థయాత్రలు చేయొచ్చా? - మురళీ, హైదరాబాద్‌
ఎవరైనా కాలం చేసినప్పుడు వారి ఇంట్లో వాళ్లకు, దాయాదులకు పది రోజులు సూతకం ఉంటుంది. దహన సంస్కారాలు నిర్వహించిన కర్తకు సంవత్సర సూతకం ఉంటుంది. 12వ రోజు దాటిన తర్వాత కర్త దేవాలయాలకు వెళ్లొచ్చు. క్షేత్రాలకు వెళ్లడం, అక్కడ కొలువుదీరిన దైవాన్ని దర్శించడానికీ ఏ అభ్యంతరమూ లేదు. పిండ ప్రదానాలకు, అస్థికల నిమజ్జనాదులకు కాశీ ప్రయాగాది క్షేత్రాలకు సంవత్సరం లోపుగానే వెళ్లే సంప్రదాయం ఉంది. అయితే, ఏడాది లోపు ఏ క్షేత్రానికి వెళ్లినా కర్త తమ గోత్రనామాలతో అర్చన, అభిషేకాదులు చేయించడంపై నిషేధం ఉంది. ప్రముఖ క్షేత్రాలకు వెళ్లినా అర్చనాదులు చేసుకునే అవకాశం లేకపోవడంతో.. చాలామంది ఈ సంవత్సర కాలపరిమితిలో ఎలాంటి తీర్థయాత్రలు చేయడానికి ఆసక్తి చూపరు. అంతేగానీ, తీర్థయాత్రలు, సాధారణ దర్శనాదులకు ఎలాంటి అభ్యంతరం లేదు.

- మల్లాప్రగడ శ్రీమన్నారాయణమూర్తి