జ్ఞాన కిరణాలు

ఇస్లాం సందేశం

ఒకసారి ఓ ఖలీఫాకు ఓ సందేహమొచ్చింది. దాన్ని నివృత్తి చేసుకునేందుకు పండితుడిని రావాల్సిందిగా సేవకుడితో కబురు పంపారు.
సేవకుడు వెళ్లిచూడగా ఆ పండితుడు పుస్తక పఠనంలో లీనమై ఉన్నారు. ఆయన చుట్టూ పెద్ద పెద్ద గ్రంథాలు గుట్టలుగా ఉన్నాయి.
‘తమరిని ఖలీఫా రమ్మన్నారు’ అని చెప్పాడు సేవకుడు.
‘నేను గొప్ప గొప్ప పండితులు, విద్వాంసులతో మాట్లాడుతున్నా. వీలు చిక్కగానే హాజరవుతాను’ అని చెప్పి సేవకుడిని పంపించేశారాయన.
సేవకుడు తిరిగి వచ్చి అదే విషయాన్ని చెప్పాడు. పండితుడు చెప్పి పంపిన సమాధానానికి ఖలీఫా ఆశ్చర్యపోయారు.
‘ఇంతకీ ఆ పండితుడి దగ్గర ఎవరున్నారు?’ అని ఆరా తీసారు ఖలీఫా.
‘నేనైతే ఎవరినీ చూడలేదు’ అన్నాడు సేవకుడు. పండితుడు అబద్దం చెబుతున్నాడని ఖలీఫా అనుకున్నాడు.
మరోసారి సేవకుడిని తిప్పిపంపారు.
ఈసారి పండితుడు ఖలీఫా ముందు హాజరయ్యాడు. ‘మీతో మాట్లాడటానికి వచ్చిన ఆ మహా విద్వాంసులు, తత్వవేత్తలు ఎవరో చెప్పండి’ అని అడిగాడు ఖలీఫా. అప్పుడా పండితుడు ఇలా సమాధానమిచ్చాడు.
‘ఆ మహానుభావులు భౌతికంగా నా పక్కన లేకపోయినా వారు రాసిన పుస్తకాల రూపంలో మంచి మిత్రులు. తమ విజ్ఞానం ద్వారా నాలో ఉన్న అజ్ఞానాన్ని తొలగిస్తారు.  సభ్యత, సంస్కారం నేర్పుతారు.’’
ఈ మాటలతో.. పండితుడు గ్రంథపఠనం చేస్తున్నారని ఖలీఫా అర్థం చేసుకున్నారు.
‘విద్యాజ్ఞానాలు అర్జించడం ప్రతీ ముస్లిం ధార్మిక విధి’ అన్న ప్రవక్త సూక్తిని ఆరాధనాభావంతో ఆచరించాలి.  

- ఖైరున్నీసాబేగం