ఆదిశక్తినే కూతురిగా కోరుకున్నాడు...

మతంగ మహర్షి పుత్రుడు మాతంగముని. అతడు హిమవంతుడితో స్నేహం చేశాడు. ఇద్దరూ ప్రేమగా మాట్లాడుకునేవారు. ఒకసారి మాటల్లో హిమవంతుడు తన పుత్రిక పార్వతీదేవి గురించి గొప్పగా చెప్పాడు. ఆమె తన కూతురు కావడం తన అదృష్టమన్నాడు. ఆ మాటల్లో తప్పు ఏమీ లేకున్నా మతంగునికి ఎందుకో నచ్చలేదు. బహుశా ఈర్ష్య కలిగింది. దాంతో ఆదిశక్తి స్వరూపమైన శ్యామలాదేవిని ఆరాధించాడు. తపస్సు చేశాడు. ఆయన భక్తికి ముగ్ధురాలైన దేవి ప్రత్యక్షమైంది. ‘ఏమి నీ కోరిక?’ అనడిగింది. ‘అమ్మా! నాకు వేరే ఏ కోరికలూ లేవు. నువ్వు నాకు కుమార్తెగా జన్మించు.  నా జన్మ చరితార్థమవుతుంది’ అంటూ వేడుకున్నాడు. దేవి కాదనలేదు. మతంగునికి పుత్రికగా పుట్టింది. అతని ఆనందానికి ఎల్లలు లేకుండా పోయాయి. హిమవంతుని గర్వమణిచాను అనుకున్నాడు. దేవి మతంగునికి పుట్టినందున మాతంగి అయ్యింది. అమ్మవారి ఎనిమిదో అవతారం మాతంగి.