సుఖసంతోషాల అన్వేషణ...

నిత్య జీవితంలో సుఖాలను అందుకోవాలనే ఆరాటంతో పరుగులు పెడుతుంటాం. తీరా ఆనందించే అవకాశం వస్తే మూర్ఖత్వంతో చేజార్చు కుంటాం. ఎండమావుల్లాంటి సంతోషాలను అన్వేషిస్తూ మళ్లీ ప్రయాణం సాగుతుంది. నిజానికి ఆనందం అనేది.. అనుభవం, అనుభూతి, ఎంపికల్లో ఉంటుందని చెప్పేవారు స్వామీ వివేకానంద. అందుకు నిదర్శనంగా ఒక ఉదాహరణ చెప్పారో సందర్భంలో...
చైనాలో ఓ వ్యక్తికి సుదీర్ఘ జైలుశిక్ష పడింది. కొన్నాళ్లకు జైలు అధికారి మారాడు. అతడు ఔదార్యం చూపడంతో కొందరు ఖైదీలకు శిక్షాకాలం తగ్గింది. అలా ఆ వ్యక్తిని జైలు నుంచి విడుదల చేశారు. కానీ బయటి కొచ్చిన అతడు ‘నాకిక్కడేం బాగా లేదు. నేను బొత్తిగా వెలుగును చూడలేక పోతున్నాను. ఎలుకలు తిరిగే చీకటి కారాగారమే అనువుగా ఉంది. దయచేసి నన్ను తిరిగి జైలుకి పంపండి.. అలా కుదరదంటే చంపేయండి’ అంటూ వేడుకున్నాడు. ఆశ్చర్యపోయిన జైలు అధికారులు అతణ్ణి తిరిగి జైలుకి పంపారు.

- మండూరి ఆకాంక్ష