అద్దెల పైన రుణం

ఈనాడు, హైదరాబాద్‌

గృహరుణం తీసుకుని కొందరు ఇల్లు కడితే.. మరికొందరు తాము దాచుకున్న సొమ్ముతో నిర్మాణాలు చేపడుతుంటారు. ఉన్నదంతా భవంతి నిర్మాణంలోనే వెచ్చిస్తుంటారు. మరి అత్యవసరంగా పెద్ద మొత్తంలో డబ్బు కావాల్సి వస్తే? భవిష్యత్తు అద్దెల మీద రుణం తీసుకోవచ్చు. బ్యాంకులు ఇప్పుడు వీటిపైన రుణాలు మంజూరు చేస్తున్నాయి. వాణిజ్య, నివాస యాజమాని ఎవరైనా ఈ రుణాలు తీసుకునేందుకు అర్హులే. ఇంటి మరమ్మతులే కాదు పిల్లల చదువు, పెళ్లిళ్లు, వ్యాపార విస్తరణ దేనికైనా వినియోగించవచ్చు. రుణ గ్రహీతల సిబిల్‌ స్కోర్‌ను బట్టి వడ్డీరేటు 10 నుంచి 13 శాతం వరకు వసూలు చేస్తున్నారు. గరిష్ఠంగా పదేళ్లకాలానికి ఈ రుణాలు తీసుకోవచ్చు. అద్దెకిచ్చిన స్థిరాస్తికి సంబంధించిన లీజు ఒప్పందం, రుణ గ్రహీత ఐటీఆర్‌ వంటి పత్రాలను దరఖాస్తుతో పాటు సమర్పించాల్సి ఉంటుంది. ప్రభుత్వ రంగ, ప్రైవేటు బ్యాంకులు ఈ తరహా రుణాలు ఇస్తున్నాయి.