ఆగ్నేయం వైపు పెరగకూడదా?

జన్మరాశి ప్రకారం ఏ మొక్కలు నాటుకోవాలి? ఆగ్నేయంలో నాలుగు అడుగులు పెరగడం మంచిది కాదా? ఇలాంటి సందేహాలను నివృత్తి చేశారు ప్రముఖ వాస్తు నిపుణులు పి.కృష్ణాది శేషు.  

* వాస్తురీత్యా ఇంటి చుట్టూరా జన్మ రాశి ప్రకారం ఎలాంటి మొక్కలు పెంచుకోవాలి?  

        - వేముల సరస్వతి, కూకట్‌పల్లి

జాతక రీత్యా 27 జన్మ నక్షత్రాలు. నక్షత్రం ప్రకారం మొక్కలు ఎంపిక చేసుకోవాలి.  అశ్వని- కుచల, జీడిమామిడి; భరణి-ఉసిరి; కృత్తిక-మేడి, అత్తి; రోహిణి-నేరేడు; మృగశిర-రేగు, మారేడు; ఆరుద్ర-కృష్ణకమల, చింత; పునర్వసు-తుమ్మ, వెదురు, గన్నేరు; పుష్యమి-రావి, పిప్పలి; ఆశ్లేష-చెంపక, సంపంగి; మఖ- మర్రి; పుబ్బ-మోదుగు, అశోక; ఉత్తర-జువ్వి; హస్త-మల్లె, సన్నజాజి, కుంకుడు; చిత్త-బిల్వ, మారేడు, తాళ; స్వాతి-మద్ది; విశాఖ- వెలగ, మొగలి; అనురాధ-పొగడ; జ్యేష్ట- వేప; మూల-బిల్వ; పుర్వాషాడ-జిల్లేడు, నిమ్మ, అశోక; ఉత్తరాషాడ-కదంబ, పనస; శ్రవణ-జిల్లేడు; ధనిష్ట- కొబ్బరి, జమ్మి; శతభిషం- మామిడి, అరటి; పూర్వభాద్ర- కదంబ, మామిడి; ఉత్తరాభాద్ర- గోరింట, వేప; రేవతి- రేగు, విప్ప.


* మేం ఈ మధ్యనే ఇంటి స్థలం కొన్నాం. ఆగ్నేయంలో సుమారు నాలుగు అడుగులు పెరిగింది. ఇలాంటివి కొనకూడదని ఒక పెద్దాయన అన్నారు. ఇప్పుడేం చేయలో తోచడం లేదు. సలహా ఇస్తారా?  

- వి.లింగరాజు, చైతన్యపురి

పెరిగిన స్థలం వేరుచేస్తూ గోడ కట్టుకోండి. ఆ స్థలంలో చెట్లు పెంచడం, ఇంకుడు గుంత ఏర్పాటు వంటివి చేసుకోవచ్చు. మీకే కాదు ఇరుగుపొరుగు వారికి కూడా మేలు జరుగుతుంది.

* వాస్తు ప్రకారం బ్రహ్మ స్థానం గురించి చెబుతారా?

- రాంనారాయణరెడ్డి, విజయవాడ

బ్రహ్మస్థానం అనేది కట్టిన ఇంటికి నాలుగు మూలలు కలుపుతూ మధ్యలో వచ్చే స్థానమే. ఇక్కడ గోడలు, స్తంభాలు రాకూడదు. ఈ స్థానం వాడుకోవడానికి వీలుగా ఉండాలి.
 

* పిశాచస్థానం ఇంటికా? స్థలానికా? దేనికి వర్తిస్తుంది?

- గెల్లి వసంతకుమార్‌, ముషీరాబాద్‌

ఇంటికి, ప్రహరీకి మధ్యలో ఇంటి చుట్టూరా ఉన్న ఖాళీ స్థలం పిశాచస్థానం అంటారు. నిర్మాణ భాషలో చెప్పాలంటే సెట్‌బ్యాక్‌గా వ్యవహరిస్తున్నారు. శాస్త్రీయంగా చూస్తే దీనితో ప్రయోజనాలు ఉన్నాయి.
 

*చాలా రకాల తులసి మొక్కలు మార్కెట్లో దొరుకుతున్నాయి. ఇంట్లో ఏరకమైనది పెంచుకోవాలి?

- ఉప్పల రామలక్ష్మి, దోమలగూడ

ప్రతీ ఇంట్లో విధిగా తులసి మొక్క పెంచుకోవాలి. పదిహేను నుంచి 18 రకాలు ఉన్నా ఇంటి ఆవరణలో మాత్రం లక్ష్మీ తులసి, విష్ణు తులసి, కృష్ణ తులసి మొక్కలను పూజిస్తుంటారు. ఇది శాస్త్ర సమ్మతం కూడా.

- ఈనాడు, హైదరాబాద్‌