ధరలు పెరిగినా.. విస్తీర్ణంలో రాజీ లేదు

ఈనాడు, హైదరాబాద్‌ : కొత్త ఇంటి విస్తీర్ణంలో కొనుగోలుదారులు రాజీపడటం లేదు. సిటీకి దూరమైనా సరే విశాలమైన ఇల్లే కావాలంటున్నారు. గత ఏడాదితో పోలిస్తే ఈ ఏడాది ఇది మరింత స్పష్టంగా కనిపించింది. వెయ్యి చదరపు అడుగుల లోపు ఇళ్లు  కొనేవారి శాతం గత ఏడాది ఏప్రిల్‌తో పోలిస్తే ఈ ఏడాది ఏప్రిల్‌లో 4 శాతం తగ్గింది.  ఈ విభాగంలో ఇళ్లు కొనేవారి కొనుగోలు శక్తి తగ్గడం కూడా ఒక కారణమై ఉండొచ్చు అని స్థిరాస్తి వర్గాలు అంటున్నాయి.

* ఈ ఏడాది ఏప్రిల్‌లో హైదరాబాద్‌ రాజధాని ప్రాంతమైన హైదరాబాద్‌, రంగారెడ్డి, మేడ్చల్‌, సంగారెడ్డి జిల్లాల్లోని రిజిస్ట్రేషన్లను చూస్తే వెయ్యి నుంచి 2వేల చ. అ. విస్తీర్ణం కలిగిన ఇళ్లు ఎక్కువగా అమ్ముడయ్యాయి. వీటి శాతమే 72గా ఉంది. గతేడాది కంటే ఇది 3 శాతం అధికం.

* 2వేల నుంచి 3వేల మధ్యలో ఉండే విలాసమైన ఇళ్ల వాటా సైతం ఒక శాతం పెరిగింది. గతేడాది ఏప్రిల్‌లో 8 శాతం ఉంటే  ఈసారి 9కి పెరిగింది.

* 3వేల చ.అ.విస్తీర్ణం కలిగిన ఇళ్ల రిజిస్ట్రేషన్లలో మార్పు లేదు. వీటి వాటా 2 శాతంగా ఉంది.  ః అల్పాదాయ వర్గాలు కొనుగోలు చేసే 500 చదరపు అడుగుల లోపు ఆవాసాల రిజిస్ట్రేషన్లు కేవలం 3 శాతంగా ఉన్నాయి. వీటిలోనూ ఎలాంటి మార్పులేదు.

అనూహ్యంగా...
ఇళ్ల కొనుగోలు ధర ఏడాదిలో సగటున 20 శాతం పెరిగింది. అత్యధికంగా సంగారెడ్డి జిల్లాలోని 36 శాతం వృద్ధి నమోదైంది.

* హైదరాబాద్‌ జిల్లాలో ఏప్రిల్‌లో చ.అ. రిజిస్ట్రేషన్‌ ధర రూ.4087గా ఉంది. గతేడాది కంటే ఇది 20 శాతం అధికం.

* మేడ్చల్‌ మల్కాజిగిరిలో సగటు చ.అ. ధర రూ.2909 (రిజిస్ట్రేషన్‌ ప్రకారం)గా ఉంది. ఇక్కడ 27 శాతం ధరలు పెరిగాయి.

* రంగారెడ్డి జిల్లాలో సగటు చ.అ.ధర రూ.4242గా నమోదైంది. పెరుగుదల 14 శాతం.