నిర్మాణంలో ఉన్న ఇళ్ల ధరల్లో పెరుగుదల

మూడు నెలల్లోనే మారిపోతున్న స్థిరాస్తుల రేట్లు
హైదరాబాద్‌తో పోలిస్తే విజయవాడ, విశాఖలో ఎక్కువ
50 నగరాల్లో ఎన్‌హెచ్‌బీ రెసిడెక్స్‌ నివేదిక

ఈనాడు, హైదరాబాద్‌: నేషనల్‌ హౌసింగ్‌ బ్యాంక్‌(ఎన్‌హెచ్‌బీ) 2023 మార్చితో ముగిసిన త్రైమాసికానికి రెసిడెక్స్‌ను విడుదల చేసింది. హౌసింగ్‌ ప్రైస్‌ ఇండెక్స్‌(హెచ్‌పీఐ) 2017-18 ఆర్థిక సంవత్సరం ఆధారంగా త్రైమాసిక ప్రాతిపదికన దేశంలోని ఎంపిక చేసిన 50 నగరాల్లో నివాస స్థిరాస్తుల ధరల కదిలికను ట్రాక్‌ చేసింది. పెరుగుతున్న నిర్మాణ వ్యయం స్థిరాస్తుల ధరలపై ప్రభావం చూపుతోందని తెలిపింది. నివేదికలో ముఖ్యంశాలను పరిశీలిస్తే..
* ప్రైమరీ లెండింగ్‌ ఇనిస్టిట్యూషన్స్‌ నుంచి  సేకరించిన అసెస్‌మెంట్‌ ధరల ఆధారంగా 50 నగరాల్లో  స్థిరాస్తుల ధరలు గత ఏడాదితో పోలిస్తే 5.8 శాతం పెరిగాయి. అంతక్రితం ఏడాది పెరుగుదల 5.30 శాతంగా ఉంది.
* ఇళ్ల ధరల్లో వార్షిక పెరుగుదల నగరాలను బట్టి వేర్వేరుగా మారుతూ ఉంది. గుజరాత్‌లోని గాంధీనగర్‌లో అత్యధికంగా 19.6 శాతం పెరుగుదల నమోదైంది. లూధియానాలో 12.9 శాతంగా ఉంది.
* హైదరాబాద్‌లో 9.4 శాతం వార్షిక పెరుగుదల ఉంటే... ఆంధ్రప్రదేశ్‌లోని విశాఖపట్నంలో మరింత ఎక్కువగా 9.4% ధరల పెరుగుదల ఏడాదికాలంలో  నమోదైంది. విజయవాడలో 5 శాతంగా ఉంది.

క్రితం త్రైమాసికంతో పోలిస్తే..

అక్టోబరు-డిసెంబరు 2022 త్రైమాసికంతో పోలిస్తే జనవరి-మార్చి 2023 త్రైమాసికం ముగింపు నాటికే ధరలు పెరిగాయి. * హైదరాబాద్‌ (1.6%), విజయవాడ(0.2%), విశాఖపట్నం(3.6%)లో ఇళ్ల ధరల పెరుగుదల కనిపించింది.

మార్కెట్‌ ప్రకారం.. : విక్రయించని.. నిర్మాణంలో ఉన్న  ఇళ్ల ధరల ఆధారంగా 50 నగరాల్లో సిరాస్తుల మార్కెట్‌ ధరను లెక్కించారు.
* వీటి ధరలు ఏడాదిలోనే 11.7 శాతం పెరిగాయి. అంతక్రితం ఇది 4.8 శాతంగా ఉంది. * హైదరాబాద్‌లో నిర్మాణంలో ఉన్న ఇళ్ల ధరలు 5.2% పెరిగితే... విజయవాడలో 16.9%, విశాఖపట్నం 26.2 శాతంతో భారీగా పెరిగాయి.  లక్నోలో అత్యధికంగా 47.6 శాతం పెరుగుదల నమోదైంది.
* డిసెంబరు 22 నాటితో మార్చి 23తో ముగిసిన త్రైమాసికంతో పోల్చగా  50 నగరాల్లో సగటున 2.6 శాతం నిర్మాణంలో ఉన్న ఇళ్ల ధరలు పెరిగాయి.* హైదరాబాద్‌లో 1.4 శాతంతో స్వల్పంగా పెరగ్గా.. విశాఖపట్నం 3.6, విజయవాడ 3.2 శాతంతో త్రైమాసిక పెరుగుదల ఎక్కువే ఉంది.