అమలు విధానం బాగుంది

ఈనాడు, హైదరాబాద్‌: తెలంగాణలో నిర్మాణ అనుమతుల జారీని సులభతరం చేసిన టీఎస్‌బీపాస్‌ చట్టం సహా దాని అమలు తీరును ఛత్తీస్‌గఢ్‌ రాష్ట్ర పురపాలకశాఖ, టౌన్‌ ప్లానింగ్‌ అధికారుల బృందం ప్రశంసించింది. నిర్మాణ అనుమతుల విధానాన్ని పరిశీలించేందుకు మూడ్రోజుల పర్యటనలో భాగంగా హైదరాబాద్‌కు వచ్చిన బృందం శుక్రవారం జీహెచ్‌ఎంసీని సందర్శించింది. ఈ సందర్భంగా నగర ముఖ్య ప్రణాళికాధికారి(సీపీపీ) దేవేందర్‌రెడ్డి వారికి టీఎస్‌బీపాస్‌ అమలు తీరును సమగ్రంగా వివరించారు. నగరంలో టీఎస్‌బీపాస్‌ ద్వారా జారీ అయిన అనుమతులు, గడువులోపు దరఖాస్తుల ఆమోదం లేదా తిరస్కరణకు గురవుతుండటం, నివాసయోగ్యపత్రాల జారీ, దరఖాస్తులను తొక్కిపెట్టే అధికారులపై నిఘా, ఇతరత్రా అంశాలపైనా అవగాహన కల్పించారు.