నోరూరించే చంబాచుక్‌..!

పొరుగు రుచి...

ఎర్రటి పచ్చడిని చూడగానే... వెంటనే నోట్లో నీళ్లూరతాయి. హిమాచల్‌ప్రదేశ్‌లో తయారుచేసే చంబాచుక్‌ పచ్చడి కూడా సరిగ్గా అలాంటిదే. దీన్ని చంబా ప్రాంతంలో పండే మిర్చితో తయారుచేస్తారు. కొంచెం కారంగా, మరికొంచెం తియ్యగా ఉండే ఈ పచ్చడిని చుక్‌ లేదా చంబాచుక్‌ అంటారు. పచ్చి లేదా ఎండుమిర్చితో చేసే ఈ పచ్చడి రుచి అదిరిపోతుందట. విందు భోజనంలో ఎన్ని రకాల పదార్థాలను వడ్డించినా.. పచ్చడి లేనిదే ముద్ద మింగుడు పడదు చాలామందికి. అలాంటివాళ్లంతా దీన్ని ఇష్టపడకుండా ఉండలేరు. చలికాలంలో ఈ పచ్చడిని ఎంతో ప్రత్యేకంగా, ఇష్టంగా తింటుంటారు హిమాచల్‌వాసులు. చపాతీ లేదా ఇతర పదార్థాల్లో దీన్ని నంజుకుని తింటే... స్వర్గం ఎక్కడో దూరంలో ఉండదంటారు ఆహార ప్రియులు.