ఔషధాల వాము!

చిరుతిళ్లు,  పిండివంటలు ఏవి తయారుచేసినా అందులో చిటికెడు వాము వేయాల్సిందే. ఇది ఆహారానికి రుచితోపాటు ఆరోగ్యాన్నీ ఇస్తుంది. మరి దీనివల్ల కలిగే ఆరోగ్య ప్రయోజనాలు ఏంటో తెలుసుకుందామా...

* వాములో ఔషధ గుణాలెక్కువ. విరోచనాలతో బాధపడుతున్నవారు వాము నీళ్లను తాగితే ఉపశమనంగా ఉంటుంది. 

* వాము జీర్ణశక్తిని మెరుగుపరిచి ఆకలిని పెంచుతుంది. కడుపు నొప్పిని తగ్గిస్తుంది.

*  దీన్ని చిన్నా, పెద్దా అందరూ తినొచ్చు.

* వాము పొడితో దంతాలను శుభ్రం చేసుకుంటే చిగుళ్లు బలంగా మారతాయి.

* జలుబుతో బాధపడేవారు వామును ఓ వస్త్రంలో కట్టి వాసన పీలిస్తే ఉపశమనంగా ఉంటుంది.

*  అన్నంలో వాము పొడిని వేసుకుని క్రమం తప్పకుండా తీసుకుంటే కీళ్లనొప్పులు తగ్గుతాయి.

* వాము రసాన్ని మజ్జిగలో కలిపి తాగితే అతిసారం, అజీర్తి తగ్గుముఖం పడతాయి.

* మూత్ర సంబంధ సమస్యలను నియంత్రిస్తుంది. పుల్లటి తేన్పులను తగ్గిస్తుంది.

* కడుపు ఉబ్బరంగా ఉన్నప్పుడు వేడి వేడి అన్నంలో వాము, నెయ్యి కలిపి తింటే సమస్య తగ్గుతుంది.

* గ్యాస్‌ ట్రబుల్‌తో బాధపడేవారికి ఇది చక్కటి ఔషధంగా పనిచేస్తుంది. మరిగే నీళ్లలో అర చెంచా వాము వేసి కాసేపు మరిగించి వడగట్టి వేడి వేడిగా తాగితే పొట్టలోని గ్యాస్‌ తేన్పుల రూపంలో బయటకు వచ్చేస్తుంది. ఈ పొడిని నమిలితే కూడా గ్యాస్‌ తగ్గిపోతుంది.