ఒక్క ఆలూ చిప్‌... లక్షన్నరే!

ఆలూ చిప్స్‌... ఇవంటే ప్రాణం పెట్టే వీరాభిమానులు ఎక్కువే. ఎంత ప్రాణం పెట్టే వాళ్లయినా చిప్స్‌ ప్యాకెట్‌కి లక్షల్లో అయితే చెల్లించే వాళ్లు ఉంటారా? ఉంటారేమో చూడాలి. ఎందుకంటే... ఇంగ్లండ్‌లోని బకింగ్‌హమ్‌కి చెందిన ఓ వ్యాపారి ఈబేలో ఓ చిప్స్‌ ప్యాకెట్‌ని అమ్మకానికి పెట్టాడు. దీని ధర రెండు వేల యూరోలు. అంటే మన సొమ్ముల్లో లక్షా అరవైవేల రూపాయలు. అప్పుడే ఆశ్చర్యపోకండి. ఇది ఒక ప్యాకెట్‌ ధర నిజమే కానీ... ఆ ప్యాకెట్‌లో ఉండేది ఒకే ఒక చిప్‌ మాత్రమే. ఎందుకు దీనికింత ధర అంటే.. ఆ చిప్‌ ప్రత్యేకమైన ఆకృతిలో మడతపడి ఉండటమే ఇందుకు కారణమట. గతంలో కూడా ఒక చికెన్‌ నగ్గెట్‌ని ఇలా ఈబెలో పెడితే రూ.75 లక్షలకు ఎవరో ఆహారప్రియుడు కొనుగోలు చేశాడట. కాబట్టి ఇదేం తొలి ప్రయత్నం కాదు. మరి ఈ చిప్‌ని ఎవరు కొంటారో చూడాల్సిందే.