వియత్నాం...మనసుదోసెన్‌!

పరదేశి పసందు!

వియత్నాంలో ఏ వీధికయినా వెళ్లండి. ఏ ఇంటికైనా వెళ్లండి. సూపర్‌మార్కెట్‌, రెస్ట్రాంట్‌.. ఎక్కడికయినా సరే! పొద్దుట్నుంచి మొదలుపెట్టి సాయంత్రం వరకూ తెల్లని మంచుపొరలాంటి ఓ వంటకాన్ని వెదురు కర్రతో తిరిగేస్తూనో, దానికోసం పిండి కలుపుతూనో కనిపిస్తారు చాలామంది. స్థానికంగా ఈ వంటకాన్ని బాన్‌కుయోన్‌ అంటారు. ఇంగ్లిష్‌లో ‘రైస్‌ పేపర్స్‌’ అనీ ‘రైస్‌ షీట్స్‌’ అనీ అంటారు. చూడ్డానికి అచ్చంగా మన దోసె తీరుగానే ఉండే ఈ షీట్స్‌ తయారీ కాస్త వైవిధ్యంగానే ఉంటుంది.
బియ్యాన్ని రోజంతా నానబెట్టి... తర్వాత మెత్తగా రుబ్బుతారు. మనం ఇడ్లీలు తయారు చేసుకునే పాత్ర లాంటి దానికి కాటన్‌వస్త్రాన్ని కట్టి దానిమీద ఈ బియ్యప్పిండిని దోసెలా పోసి మూత పెట్టేస్తారు. ఇలా ఆవిరిమీద ఉడికిన రైస్‌షీట్స్‌ ఫ్రిజ్‌లో నాలుగురోజుల వరకూ నిల్వ ఉంటాయి. ఈ షీట్స్‌ మధ్యలో ఉడికించిన రొయ్యలు, చికెన్‌, కాయగూరముక్కలు పెట్టి మడత వేస్తారు. ఇవే షీట్స్‌ రెడీమేడ్‌గా కూడా దొరుకుతాయి. ఇంట్లో రైస్‌ రోల్స్‌ చేసుకునే ముందు.. ఈ షీట్స్‌ని రెండు నిమిషాలు నానబెడితే సరి. వియత్నామీ స్త్రీలు ఎక్కువ మంది వీటి తయారీతోనే ఉపాధి పొందుతున్నారు. ఇంట్లోనే తయారుచేసుకోవాలి అనుకునే వారికి బాన్‌కుయోన్‌ కిట్లు దొరుకుతాయి.