నాన్‌వెజ్‌ లా..లాంటివి!

ట్రెండుగురూ!

నాన్‌వెజ్‌ తినడం అంటే జీవహింసకు పాల్పడటం మాత్రమే కాదు... పర్యావరణానికీ చేటుచేయడమే అంటోంది ఉదయ్‌పూర్‌కు చెందిన స్టార్టప్‌ సంస్థ ‘గుడ్‌డాట్‌’. అందుకే మాంసాహార రుచులకు ప్రత్యామ్నాయంగా మొక్కల నుంచి సేకరించిన మాంసకృత్తులతో వినూత్నంగా ‘వెజిటేరియన్‌ నాన్‌వెజ్‌’ని తయారుచేసింది. దీంతో కీమా బర్గర్లు, బుర్జీ బర్గర్లు, ఫ్రైడ్‌ క్రిస్పీ వంటి వివిధ రకాల రుచులని నోరూరేలా చేసి అందిస్తోంది. రుచి, పోషకాల్లో అచ్చంగా మాంసాహారాన్ని పోలిన ఈ రుచుల వల్ల ఆరోగ్యం, పర్యావరణం రెండూ బాగుంటాయని అంటున్నారు తయారీదారులు. గోధుమలు, సోయా, ఆలూ, చిక్కుడు వంటి మొక్కల నుంచి ఈ ప్రొటీన్లను సేకరిస్తున్నారు. సాధారణంగా నాన్‌వెజ్‌ ఉత్పత్తులని తెలియచేయడానికి ఎర్రని చుక్క వాడతారు. అదే శాకాహార ఉత్పత్తి అయితే పచ్చని చుక్క వాడతారు. ఇవి మాంసాహారానికి ప్రత్యామ్నాయం అందించే ఉత్పత్తులు కాబట్టి గుడ్‌డాట్‌ అనే పేరు పెట్టాం అంటున్నారు సంస్థ సీఈవో అభిషేక్‌ సిన్హా.