వెదురు సాంబారు..చామాకు పొట్లాలు!

చామాకుతో చేసిన పొట్లాలు, వెదురుతో చేసిన సాంబారు... సింగాడా దుంపలతో చేసిన బర్ఫీలు. ఇవన్నీ ఎక్కడి ప్రత్యేకమో తెలుసా? ‘రైస్‌ బౌల్‌ ఆఫ్‌ ఇండియా’గా చెప్పుకొనే ఛత్తీస్‌గఢ్‌ క్యుజీన్‌ ప్రత్యేకం. రుచికరమైన గిరిజన వంటకాలకూ ఈ ప్రాంతం పెట్టింది పేరు..

వరి ఎక్కువగా పండుతుంది కాబట్టి బియ్యప్పిండితో అనేక రకాల వంటకాలు చేస్తారు. ఆకుకూరలు, దుంపలు, వెదురు చిగుళ్లతో బియ్యప్పిండిని కలిపి చేసే వంటకాలు చాలా ప్రత్యేకంగా ఉంటాయి. అమిటీ.. ఈ వంటకాన్ని ఛత్తీస్‌గఢ్‌ సాంబార్‌ అంటారు. ఇది బస్తర్‌ ప్రత్యేకం. అన్ని కాయగూరలు, పప్పుతోపాటు వెదురు చిగుళ్లు కూడా వేసి ఈ దీనిని తయారుచేస్తారు. ఇక చెరువుల్లో దొరికే నీటి దుంపల్ని సింగాడాలని అంటారు. వాటిని మరపట్టి దాని పిండితో చేసే సింగాడా బర్ఫీలు దేశంలో మరే ప్రాంతంలో దొరకవు. ఆటాతో కాకుండా బియ్యప్పిండితో చేసే ఫరాలని లోకల్‌ మోమోలు అంటారు. ఆవిరిమీద ఉడికించే ఈ వంటకం ఆరోగ్యానికీ ఎంతో మేలు చేస్తుంది. లేత చామాకులని, సెనగపిండిని పొరపొరలుగా వేసి చేసే ‘కొచ్చయి పట్టా’ అయితే ఈ క్యుజిన్‌కే అత్యంత ప్రత్యేకమైన వంట. ఛత్తీస్‌గఢ్‌లో ఎక్కువగా మహువా పూలు పూస్తుంటాయి. వీటితో జ్యూస్‌ తయారు చేస్తారు. ఎక్కువ నూనె వాడకుండా... ఆవిరిమీద ఉడికించి, నువ్వులని ఎక్కువగా వాడి ఈ వంటకాలు చేస్తారు. అన్నట్టు చీమలతో చేసే రెడ్‌ ఆంట్‌ చట్నీ కూడా ఛత్తీస్‌గఢ్‌ ప్రత్యేకమే.