చంపారన్‌ కుండ కూర...!

కుండ బిర్యానీ గురించి విని ఉంటారు. మరి కుండ మటన్‌ గురించి విన్నారా? ఉత్తరాదిన మనకు చాలా చోట్ల స్టాళ్లలో పెట్టి కుండల్లో అమ్మే మటన్‌ కనిపిస్తుంది. దీన్నే చంపారన్‌ మటన్‌ అనీ, అహునా, హండీమీట్‌ అనీ పిలుస్తుంటారు. ఎక్కువగా చంపారన్‌ మీట్‌గా ప్రాచుర్యంలో ఉన్న ఈ కుండ కూరకి మూలం బిహార్‌లోని చంపారన్‌ ప్రాంతం..

అహునా మటన్‌ కర్రీ.. లేదా చంపారన్‌ మటన్‌కర్రీ తయారీ చాలా ప్రత్యేకంగా ఉంటుంది. ఒక కుండలో మటన్‌, ఆవనూనె, నెయ్యి, వెల్లుల్లిని రెబ్బలుగా కాకుండా మొత్తం పాయలుగా వేస్తారు. తక్కిన పదార్థాలు కూడా వేసి కుండపై మట్టి మూతపెట్టి అందులోని ఆవిరి బయటకు పోకుండా ఉండేందుకు గోధుమపిండితో మూసేస్తారు. ఈ కుండని మంటపై కాకుండా బొగ్గులపై నిదానంగా ఉడికిస్తారు. ఎక్కడా నీళ్లు వాడరు. అందులోని ఆవిరితోనే అది ఉడకాల్సి ఉంటుంది. ఈ పద్ధతిలో చేసిన చంపారన్‌ మీట్‌ ఒకప్పుడు ఉత్తరాదికే పరిమితం అయినా ఇప్పుడు మన దక్షిణాదిలోనూ సందడి చేస్తోంది.