కీమాబాల్స్‌ విరగకుండా రావాలంటే...

మా పిల్లలకి కీమా బాల్స్‌ చేసి పెట్టాలని ఉంది. సరిగా రావడం లేదు. ఎంత జాగ్రత్తగా చేసినా విరిగిపోతున్నాయి. వీటిని తేలిగ్గా, రుచిగా చేసుకొనేందుకు చిట్కాలుంటే చెబుతారా?

* మటన్‌కీమాని కొనేటప్పుడే కొన్ని జాగ్రత్తలు తీసుకోవాలి. కీమాతోపాటు తెల్లని ఫ్యాట్‌ ఉంటుంది దీనిని చికన అంటారు. దాన్ని కూడా కొద్దిగా వేయించుకోవాలి. అలాగే రిబ్స్‌ దగ్గర ఉండే లేత మాంసం సీనకూర అంటారు. దానిని కూడా వేసి కీమా కొట్టమనాలి. ఆ తర్వాత మాంసాన్ని శుభ్రం చేసుకుని, నీళ్లు లేకుండా పిండుకోవాలి. ఈ కీమాలో అల్లంవెల్లుల్లి, ఉల్లిపాయముక్కలు, కారం, ఉప్పు, ధనియాల పొడి, గరంమసాలా, సెనగపిండి వేసి కలుపుతారు. ఇక్కడ సెనగపిండికి బదులుగా పుట్నాల పొడి వేసుకుంటే రుచి బాగుంటుంది. కరకరలాడుతూ వస్తాయి. అలాగే పచ్చి ఉల్లిపాయలు వేస్తే దానిలోని నీరు బయటకు వచ్చి ఉండలు విరిగిపోతాయి. బదులుగా వేయించిన ఉల్లిపాయలు కలిపితే మంచి రుచి వస్తుంది. పిండి కలిపేటప్పుడు ఎక్కువ నీళ్లు పోయొద్దు. కొంచెం గట్టిగా కలపాలి. అలాగే.. నూనె వేడెక్కాక ఉండలు వేసి వెంటనే కలపకూడదు. పావు నిమిషం ఆగి అప్పుడు కదపాలి. లేకపోతే విరిగిపోతాయి. ఎంత చేసిన విరుగుతున్నాయి అనుకొంటే ఒక గుడ్డు పగలకొట్టి  కీమా మిశ్రమంలో వేయండి. రుచిగా, విరగకుండా వస్తాయి.