ఈ ఉప్పుది... పొగవాసన!

వంటలోకి ఉప్పు కావాలా... ఏ రకం ఉప్పు కావాలి? అదేం ప్రశ్న...  ఇందులో కూడా రకాలుంటాయా అనేగా మీ సందేహం. ఎందుకు ఉండవు? ఉప్పులోనూ అనేక రకాల రుచులు చేరుతున్నాయి. స్మోకీ సాల్ట్‌, సీజన్డ్‌ సాల్ట్‌ వంటివీ ఆ కోవలోకే వస్తాయి..

స్మోకీ సాల్ట్‌: కూరలకి ముఖ్యంగా చేపలు, పీతలు వంటి సీఫుడ్‌కి ప్రత్యేక రుచిని ఇస్తుందీ స్మోకీ సాల్ట్‌. కర్రలని కాల్చి.. ఆ పొగను చూపించి ఈ ఉప్పుని ప్రత్యేకంగా తయారుచేస్తారు. ముఖ్యంగా ఓక్‌, హికరీ, యాపిల్‌ ఉడ్‌ వంటి చెక్కల నుంచి వచ్చిన పొగతో తయారు చేసిన ఉప్పుకి బాగా డిమాండ్‌ ఉంది. వాడిన చెక్క రకాన్ని బట్టి ధరను నిర్ణయిస్తారు. బార్బిక్యూ వంటలకు స్మోకీ రుచిని ఆపాదించే ఈ ఉప్పుకు ప్రపంచవ్యాప్తంగా అభిమానులు పెరుగుతున్నారు.

సీజన్‌ సాల్ట్‌: మామూలు టేబుల్‌ సాల్ట్‌తో పోలిస్తే కొంతవరకూ ఇది ఆరోగ్యదాయకం. కారణం ఈ ఉప్పులో హానికారక సోడియం స్థాయిలు తక్కువగా ఉండి... హెర్బల్స్‌ స్థాయిలు ఎక్కువగా ఉంటాయి. ఆరోగ్యానికి మేలు చేసే హెర్బల్స్‌ని జోడించి చేసిన ఈ సాల్ట్‌ సలాడ్స్‌, కూరలకి ప్రత్యేకమైన రుచిని తెస్తుంది.