మెదడుకు శక్తి... వాల్‌నట్స్‌

మెదడు ఆకారాన్ని పోలి ఉండే ఈ డ్రైఫ్రూట్‌.. నట్స్‌ అన్నింట్లో కల్లా బలమైన ఆహారం. అయితే వీటిలో కొవ్వు శాతం కాస్త ఎక్కువే. 100 గ్రాముల వాల్‌నట్స్‌ నుంచి దాదాపు 64 శాతం కొవ్వు, 687 కెలొరీల శక్తి లభ్యమవుతాయి.  ప్రొటీన్లు- 15 గ్రా.,  పిండిపదార్థాలు- 11 గ్రా., ఉంటాయి.

* ఇవి చెడు కొలెస్ట్రాల్‌ను తగ్గించి గుండెకు మేలు చేసే గుడ్‌ కొలెస్ట్రాల్‌ను పెంపొందిస్తాయి.
* వీటిలో ఒమేగా ఫ్యాటీ-3 ఆమ్లాలతోపాటు  పాలీఫినాల్స్‌ కూడా మెండుగానే ఉంటాయి. ఇవి ఫ్రీరాడికల్స్‌ను నిరోధిస్తాయి.
* వీటిని తింటే మెదడు ఆరోగ్యానికి చాలా మంచిది. అల్జీమర్స్‌, డిమెన్షియా లాంటి అనారోగ్యాలు దరిచేరవు.
* పేగుల్లో మంచి బ్యాక్టీరియాను ఈ వాల్‌నట్స్‌ వృద్ధి చేస్తాయని పరిశోధనలు చెబుతున్నాయి.
* వీటిలో విటమిన్లు, క్యాల్షియం, పొటాషియం, సోడియం, కాపర్‌, మాంగనీస్‌ లాంటి ఖనిజ లవణాలు ఎక్కువగా ఉంటాయి. ఫోలిక్‌ యాసిడ్‌ కూడా అధికమే. రక్తహీనతతో బాధపడేవారు వీటిని తీసుకుంటే చాలా మంచిది.  
* యాంటీఆక్సిడెంట్లు, యాంటీఇన్‌ఫ్లమేటరీ గుణాలు కూడా ఎక్కువే. అధిక బరువు ఉన్నవారు వీటిని తింటే త్వరగా ఆకలి వేయదు. దాంతో బరువు నియంత్రణలో ఉంటుంది.
* వీటిని నానబెట్టుకుని తింటే చాలా మంచిది. దీంట్లో పీచు అధిక మొత్తంలో ఉంటుంది. చిన్నాపెద్దా అందరూ తినొచ్చు.