ఈ బఠాణీ... పోషకాల గని!

లేతపచ్చిబఠాణీలను కూరల్లోనే కాదు సాయంకాలాల్లో స్నాక్స్‌లా తీసుకోవచ్చు. ఇతర ఎండుఫలాలతో కలిపి ఎంచక్కా లాగించేయొచ్చు. కొవ్వులు లేని ఈ గింజల వల్ల కలిగే ప్రయోజనాలు బోలెడు.

* 100 గ్రాముల పచ్చి బఠాణీల్లో మూడొంతుల నీరే ఉంటుంది. మాంసకృత్తులు, పీచు 5.5 గ్రా. ఉండగా.. 84 కెలొరీల శక్తి లభిస్తుంది. వీటిలో ప్రొటీన్లు, సూక్ష్మపోషకాలు, విటమిన్లతోపాటు క్యాల్షియం, ఇనుము, కాపర్‌, జింక్‌, మాంగనీస్‌ లాంటి ఖనిజాలూ ఎక్కువే.

* పీచు దండిగా ఉండే బఠాణీలను తింటే మలబద్ధకం సమస్య ఉత్పన్నం కాదు. ఇవి జీర్ణవ్యవస్థ పనితీరును మెరుగుపరుస్తాయి. కాలేయాన్ని ఆరోగ్యంగా ఉంచుతాయి.
* వీటిలో విటమిన్‌-సి పుష్కలంగా ఉంటుంది. కాబట్టి క్రమం తప్పకుండా తీసుకుంటే రోగనిరోధకత పెరుగుతుంది.
* ఈ గింజల్లోని విటమిన్‌-కె ఎముకకు ఆరోగ్యాన్నిచ్చి ఆస్టియోపోరోసిస్‌ రాకుండా అడ్డుకుంటుంది. ముఖ్యంగా మహిళలు తమ రోజువారీ ఆహారంలో వీటిని చేర్చుకుంటే. వ్యాధి బారిన పడకుండా ఉండొచ్చు.

* వీటిని తింటే ఆరోగ్యమే కాదు అందం కూడా. ఈ గింజలు తినడం వల్ల చర్మంపై ముడతలు, గీతలు రావు. అంటే వృద్ధాప్య ఛాయలు దరి చేరవన్నమాట.
* బరువు తగ్గాలనుకునేవారు ఓ చిన్న కప్పు ఉడికించిన లేత బఠాణీలను స్నాక్‌లా తినొచ్చు. దాంతో కడుపు నిండిన భావన కలిగి చాలాసేపటి వరకు ఆకలి వేయదు.