జ్ఞాపకశక్తికి కుంకుమ పువ్వు!

ఈ పువ్వు రేకలు ఆరోగ్యాన్నిస్తాయి. అందానికి మెరుగులు దిద్దుతాయి. ఒకట్రెండు తీసుకున్నా బోలెడు ఆరోగ్య ప్రయోజనాలను చేకూరుస్తాయి. అత్యంత ఖరీదైన ఈ పూరేకల వల్ల కలిగే లాభాలూ ఎక్కువే.
* కుంకుమ పువ్వు... కుంకుమ రంగులో ఉండటం వల్ల దీనికా పేరొచ్చింది. ఇది చాలా ఖరీదైంది. మనదేశంలో కశ్మీర్‌ ప్రాంతంలో పండుతుంది. దీంట్లో ఔషధ గుణాలు చాలా ఎక్కువ.  
* సాధారణంగా కుంకుమ పువ్వు మొక్క చాలా చిన్నగా ఉంటుంది. పూలకుండే కేసరాల నుంచే ఈ కుంకుమ పూ రేకలను సేకరిస్తారు.  
* ఈ పువ్వులోని సువాసనలు ఒత్తిడి, ఆందోళనలను తగ్గించి హాయిగా నిద్ర పట్టేలా చేస్తాయి. దీని రుచి ప్రత్యేకంగా ఉంటుంది. అంతే కాదు దీన్ని తరచూ తీసుకోవడం వల్ల మెదడు ప్రశాంతంగా ఉంటుంది.
* కంటి చూపును కాపాడుతుంది. చర్మ    ఆరోగ్యాన్ని పరిరక్షిస్తుంది... పంటి నొప్పిని దూరం చేస్తుంది.
* సువాసనలతోపాటు శరీరానికి శక్తినీ ఇస్తుంది.
* నెలసరి సక్రమంగా రానివారు రెండు కుంకుమ పూ రేకలను గోరువెచ్చని పాలలో వేసుకుని తాగితే ఫలితం ఉంటుంది. ఈ పువ్వును తరచూ తీసుకుంటే రక్తస్రావం చక్కగా అవుతుంది.  
* మన దేశంలో ఎక్కువగా దీన్ని వంటకాల్లో వాడతారు. ఆహారంగా, ఆరోగ్యపరంగానే కాదు సౌందర్య ఉత్పత్తుల తయారీలోనూ దీన్ని వాడకం అధికమే.
* జలుబుతో బాధపడేవారు గోరువెచ్చని పాలలో చిటికెడు వేసి తాగితే కాస్త ఉపశమనంగా ఉంటుంది. అలాగే రోజు పాలతో తీసుకుంటే జ్ఞాపకశక్తి కూడా పెరుగుతుందట.
* గర్భాశయంలో కదలికలను సులభతరం చేయడానికి ఈ పువ్వు సాయం చేస్తుంది.
* కుంకుమ పువ్వు నిత్యం ఆహారంలో చేర్చుకుంటే గ్యాస్‌, కడుపులో మంట, అజీర్తి, మలబద్ధకం... లాంటి సమస్యలు తగ్గిపోతాయి.
* ఇది చెడు కొలెస్ట్రాల్‌ను నియంత్రించి గుండె సమస్యలకు చెక్‌ పెడుతుంది.
* కొన్ని రకాల రుతు సమస్యలకు ఔషధంలా పనిచేస్తుంది.