చల్లదనానికి చిరు ధాన్యాలు!

వేసవి వస్తుందంటే శరీరానికి చల్లదనాన్నిచ్చే ఆహారం తినాలని అనుకుంటాం. మనకు తెలిసిన మజ్జిగ, సొరకాయలు వంటివి మాత్రమే కాకుండా చిరుధాన్యాలు కూడా చలువ చేస్తాయి. ముఖ్యంగా రాగులు, జొన్నలు, కొర్రలు ఈ కాలంలో ఎంతో మేలు చేస్తాయి..

రాగులు: వీటిల్లో క్యాల్షియం పుష్కలంగా ఉంటుంది. అందుకే వీటిని ‘పేదోళ్ల పాలు’గా పిలుస్తారు. రక్తహీనతతో బాధపడేవారు రాగి జావ తీసుకుంటే త్వరగా కోలుకుంటారు. బెల్లంతో కలిపి తీసుకుంటే ఎక్కువ పోషకాలు అందుతాయి.

జొన్నలు: ఇవి వేసవిలో బాగా చలువచేస్తాయి. బి విటమిన్లు అధికంగా ఉంటాయి. జుట్టు, చర్మానికి మంచిది. వర్కవుట్లు చేయడానికి ముందు తాగితే పోషకాలు కోల్పోకుండా చేస్తుంది.

బార్లీ: బార్లీ నీరు తాగుతూ ఉంటే శరీరానికి తగిన పోషకాలు అంది మూత్ర సంబంధిత సమస్యలు రాకుండా ఉంటాయి. కడుపు ఉబ్బరం తగ్గుతుంది. రాత్రి బార్లీ గింజలు నానబెట్టి.. తెల్లారి ఆ నీళ్లు తాగితే మంచిది. మొలకలు వచ్చిన బార్లీ గింజల పొడిని చపాతీల్లో కలిపినా చక్కని ప్రయోజనాలు అందుతాయి.