పరీక్షలా.. ఇవి తినండి!

వచ్చేది పరీక్షాకాలం.. ఏడాదంతా చదవడం ఒకెత్తు. ఇప్పుడు చదవడం ఒకెత్తు. శరీరానికి హాయిగా ఉంటూ... ఒత్తిడిని తగ్గించే ఆహారం తీసుకోవడం చాలా అవసరం అంటున్నారు పోషకాహార నిపుణులు..

గుడ్డు: ఇనుము, బి12సహా విటమిన్లు నిండుగా ఉండే గుడ్లతో రోజుని మొదలుపెడితే సరిపోతుంది. ఉడికించి, ఆమ్లెట్‌, ఎగ్‌ బుర్జీ ఎలా అయినా ఇవ్వండి. చదివినవి మర్చిపోకుండా ఉంటారు. తేలిగ్గా గుర్తుపెట్టుకుంటారు.

పచ్చనివి: కొత్తిమీర, పాలకూర, కరివేపాకు, చుక్కకూర ఏదైనా ఆకుకూరైనా తీసుకోండి. పప్పులోనో, పచ్చడిలోనో జోడించండి. అలసిన కళ్లకు మేలు చేస్తాయి. కంటిచూపు చురుగ్గా ఉంటుంది. మెదడు చకచకా పనిచేస్తుంది.

వాల్‌నట్స్‌: ఇవేకాదు పల్లీలు, బాదం, పిస్తా ఏవైనా సరే గుప్పెడు గింజల్ని పిల్లలకు సాయంత్రం చిరుతిండిగా పెట్టండి. ఇవి పిల్లల్లో గ్లూకోజ్‌ స్థాయులు తగ్గకుండా చూసి రోజంతా శక్తిమంతంగా ఉండేట్టు చేస్తాయి. ఒత్తిడి కారణంగా వచ్చే మతిమరుపు దరిచేరదు.

ఉసిరికాయలు: పరీక్షలు ఉన్నన్ని రోజులు కాసిని ఉసిరి క్యాండీలనో, ఉప్పులో వేసిన ముక్కలనో దగ్గర పెట్టుకోండి. పిల్లలకు అప్పుడప్పుడు ఇవ్వండి. ఇవి మెదడుకి ఆక్సిజన్‌ పుష్కలంగా అందేట్టు చేసి పిల్లల్ని చురుగ్గా ఉంచుతాయి. హుషారుగా పరీక్షలు రాసేందుకు సహకరిస్తాయి.

నీళ్లు: అరె నీళ్లు కూడా పోషకాలేనా అనుకోవద్దు. పరీక్షల సమయంలో... చాలామంది పిల్లలు నీళ్లు తాగరు. శరీరానికి సరిగా నీళ్లు అందకపోతే... పిల్లల్లో ఏకాగ్రత దెబ్బతింటుంది. అందుకే నీళ్లు సమృద్ధిగా తాగాలి.

వీటితోపాటు ఒమెగా-3 ఫ్యాటీ యాసిడ్లు ఉండే అవిసెగింజలు, ఓట్స్‌ వంటివి తినడం వల్ల పిల్లలు హుషారుగా ఉంటారు. ఒత్తిడిని జయిస్తారు.