థాయ్‌ పొంగనాలు.. తీపి గుడ్లు!

మిగల మగ్గిన మామిడిపండుని పెరుగన్నంతో కలిపి తినడం తెలుసు. కానీ అన్నంలో ఎప్పుడైనా మామిడిపండుని కలుపుకొని తిన్నారా? థాయ్‌లాండ్‌ వెళ్తే మీకు ముందుగా స్వాగతం పలికేది ఈ మామిడిపండు అన్నమే! ఇదే కాదు మరెన్నో ఆసక్తి గొలిపే వంటకాలూ ఈ ప్రాంతంలో దొరుకుతాయి..

థాయ్‌ పొంగనాలు: ఇక్కడ పొంగనాలేంటి అనుకుంటున్నారా? నిజమేనండీ బియ్యప్పిండీ, కొబ్బరిపాలు, కొద్దిగా తీపి వేసి మనం చేసే గుంట పొంగనాల్లా ఉండే ఈ వంటకాన్ని కనోమ్‌ క్రాక్‌ అంటారు. అయితే వీటి మధ్యలో కొత్తిమీర, పాండా ఆకులు ఉంటాయి.

మ్యాంగో స్టికీరైస్‌: తీయని మామిడి పండ్లకి, జిగురుగా ఉండే బియ్యానికి థాయ్‌లాండ్‌ ప్రాచుర్యం పొందింది. వీటిని కలిపి వండే మ్యాంగో స్టికీరైస్‌ని రుచి పరమాద్భుతంగా ఉంటుందట. అందుకే పర్యటకులు ఈ రుచికి ఫిదా అయిపోతుంటారు. స్థానికంగా ఈ వంటకాన్ని కావో మివావో మా మువాంగ్‌ అంటారు. కొబ్బరిపాలు, మామిడిపండ్లు, జిగురుబియ్యం, పెసరపప్పు కలిపి చేసే వంటకం చూడ్డానికే కాదు రుచిలోనూ భేషుగ్గా ఉంటుంది. థాయిలాండ్‌లో ఏ మూలకెళ్లినా ఈ స్టిక్కీ రైస్‌ దొరుకుతుంది. బ్యాంకాక్‌ అన్నింటికన్నా బెస్ట్‌ ప్లేస్‌ అని చెప్పాలి. 

తీయని గుడ్లు: థాయిలాండ్‌లో ఎక్కడకు వెళ్లినా నారింజ రంగు మిఠాయిలు కనిపిస్తాయి. వీటిని బాతు గుడ్లతో చేస్తారు. చూడ్డానికే కాదు తినడానికీ బాగుంటాయి.