డ్రాగన్‌ ఫ్రూట్‌... పోషకాల ఖజానా!

గులాబీ రంగులో అరచేతిలో పట్టేంత ఈ పండు ఆకర్షణీయంగానే కాదు రుచిగానూ ఉంటుంది.  దీనివల్ల ఎన్నో ఆరోగ్య ప్రయోజనాలు...

పండు పైన గులాబీ రంగులో.. లోన తెల్లని గుజ్జుతో.. నల్లని చిన్న విత్తనాలతో ఉంటుంది. ఈ పండులో మూడు రకాలుంటాయి. కప్పు గుజ్జు నుంచి దాదాపు 136 కెలొరీలు అందుతాయి. పిండిపదార్థాలు- 29 శాతం, పీచు- 7 గ్రా., మాంసకృత్తులు- 3 గ్రా., ఇనుము- 8 శాతం ఉంటాయి. కొవ్వులు అస్సలుండవు. జింక్‌, మెగ్నీషియం, ఫాస్ఫరస్‌ ఖనిజాలు మెండుగా ఉంటాయి. పోషకాలు పుష్కలం. దీని నుంచి అందే కెలొరీలు అత్యల్పం.  మిగతా పండ్ల మాదిరే దీంట్లోని యాంటీఆక్సిడెంట్లు శరీరానికి హాని చేసే ఫ్రీరాడికల్స్‌ నుంచి రక్షిస్తాయి.

ఈ పండు ఇన్సులిన్‌ రెస్టిసెన్స్‌ను పెంచుతుంది. దీనిలోని రసాయనాలు కాలేయాన్ని ఆరోగ్యంగా ఉంచుతాయి. ఒమేగా-3 ఫ్యాటీ ఆమ్లాలు దీని గింజల్లో పుష్కలంగా ఉంటాయి. ఇవి గుడ్‌ కొలెస్ట్రాల్‌ను పెంచుతాయి. సమృద్ధిగా ఉండే పీచు జీర్ణవ్యవస్థను ఆరోగ్యంగా ఉంచుతుంది. అలాగే బరువునూ నియంత్రిస్తుంది. ఈ పండులోని పిటయా అనే పోషకం రోగనిరోధకతను పెంచుతుంది. విటమిన్‌-సి, కెరొటినాయిడ్‌లు ఇన్‌ఫెక్షన్స్‌తో పోరాడతాయి. ఈ పండులోని మెత్తటి భాగాన్ని ముక్కలుగా చేసుకుని తినొచ్చు. దీని గుజ్జుతో స్మూథీలు చేసుకోవచ్చు. సలాడ్‌లా, పెరుగులోనూ వేసుకోవచ్చు.