ద్రాక్ష... ఆరోగ్య రక్ష!

తియ్యనైన ద్రాక్షలో.. విటమిన్లు, మినరళ్లు, యాంటీఆక్సిడెంట్లు మెండుగా ఉంటాయి. నీరు సమృద్ధిగా ఉంటుంది. ఆకుపచ్చ, ఊదా, ఎరుపు రంగుల్లో ఈ పండ్లు లభ్యమవుతాయి. వీటివల్ల ప్రయోజనాలేంటో చూడండి..

* అలసట, ఆకలిగా అనిపించినప్పుడు గుప్పెడు ద్రాక్షపండ్లు తినండి. ఆకలి తీరడంతోపాటు తక్షణ శక్తీ లభిస్తుంది.
* కప్పు పండ్ల నుంచి 62 కెలొరీల శక్తి లభిస్తుంది. పిండిపదార్థాలు-16 గ్రా.,  మాంసకృత్తులు-0.6 గ్రా., కొవ్వులు-0.3 గ్రా., ఉంటాయి.  
* ఈ పండ్లలో విటమిన్‌-సి పుష్కలంగా ఉంటుంది. వీటిని తింటే రోగనిరోధక  శక్తి పెరుగుతుంది. దాంతో ఇన్‌ఫెక్షన్ల నుంచి దూరంగా ఉండొచ్చు.
* వీటిలోని పొటాషియం నిల్వలు రక్తపోటు పెరగకుండా నియంత్రిస్తాయి.
* పీచు కూడా ఎక్కువే. ఇది కొలెస్ట్రాల్‌ స్థాయులను తగ్గిస్తుంది. మలబద్ధకం సమస్యను నివారిస్తుంది.  
* ఈ పండ్లలోని విటమిన్‌-కెతోపాటు, క్యాల్షియం, మెగ్నీషియం, పొటాషియం ఖనిజాలు ఎముక ఆరోగ్యాన్ని కాపాడతాయి.  
* గుండె జబ్బులు, కంటి సమస్యలు కొన్ని రకాల క్యాన్సర్లు రాకుండా ఇవి అడ్డుకుంటాయి.
* పండ్లను జ్యూస్‌లా కాకుండా నేరుగా తీసుకుంటేనే ఎక్కువ ప్రయోజనం ఉంటుంది. పిల్లలకు వీటిని ఇలాగే అలవాటు చేయాలి.
* నల్ల ద్రాక్షలో కొన్ని రకాల యాంటీఆక్సిడెంట్లు పుష్కలంగా ఉంటాయి. ఇవి ఇమ్యూనిటీతోపాటు వృద్ధాప్య ఛాయలు రాకుండా అడ్డుకుని చర్మానికి మెరుపునిస్తాయి.
* ఎండిన ద్రాక్షనే రెసిన్స్‌/కిస్‌మిస్‌ అని పిలుస్తారు. వీటిలోనూ పోషకాలు బోలెడు. చిన్నా, పెద్దా అందరూ తీసుకోవచ్చు. మధుమేహులు వైద్యుల సూచనల మేరకు మాత్రమే తినాలి.
* చిన్నారులకు చాక్లెట్‌, స్వీట్లకు ప్రత్యామ్నాయంగా వీటిని ఇస్తే ఇష్టంగా తింటారు.