ఈ మోమోలకు... కోటి మంది ఫిదా!

మోమోస్‌ తెలుసా! చూడ్డానికి కజ్జికాయల్లా ఉండే వీటిని ఆవిరిమీద ఉడికించి చేస్తారు. రుచిగా ఉండి ఆరోగ్యానికి మేలు చేసే మోమోలని మరింత సృజనాత్మకంగా తయారుచేసి శభాష్‌ అనిపించుకుంటోంది సూరత్‌ అమ్మాయి వర్షసింగ్‌. ఈమె చేసిన మోమోలని ఇంతవరకూ 13 మిలియన్ల మంది చూశారు.. 

కాలేజీ అమ్మాయి వర్షసింగ్‌ తయారుచేస్తున్న మోమోలకి ఇంతగా ఆదరణ రావడానికి కారణం వాటిని ఆమె తయారుచేసిన విధానమే. మైదాని చపాతీల్లా ఒత్తి... అందులో క్యాబేజీ, క్యారెట్‌, బీన్స్‌ వంటివాటిని చిన్నముక్కలుగా తరిగి ఉంచి ఆవిరిమీద ఉడికిస్తారు. ఇవి చూడ్డానికి చిన్న చిన్న మూటల్లా ఉంటాయి. ఆ పక్కనే సాస్‌లు ఇస్తారు. వర్ష మాత్రం కాస్త భిన్నంగా ఈ మోమోస్‌ని నాలుగు గళ్లు ఉండేలా తయారుచేసింది. ఆ గడుల్లో గ్రీన్‌చట్నీ, టొమాటోసాస్‌, తందూరీసాస్‌, మయొనీస్‌ వంటివి వేసి అందిస్తోంది.  

సామజిక మాధ్యమాల్లో ఇవి షాట్‌ మోమోస్‌ పేరుతో వైరల్‌ అవుతున్నాయి. ఇంతవరకూ ఈ వీడియో కోటీముప్ఫైలక్షలమంది చూశారు.