షడ్రుచులతో ఉగాదిని ఆహ్వానిద్దాం..

నేను ఏ సంవత్సరం ఉగాది పచ్చడి చేద్దామన్నా దాంట్లోకి కావల్సిన అన్ని వస్తువులు నాకు ఇక్కడ దొరకవు. అందులో వాడే ఆరు రుచులకు ప్రత్యామ్నాయంగా ఏమైనా వాడొచ్చా తెలియజేయండి?

రమ్య, కోల్‌కతా

కావాల్సిన పదార్థాలు: వేపపూత- కొద్దిగా, చింతపండు- చిన్న నిమ్మకాయంత, కారం- అరచెంచా, బెల్లం- 50గ్రాములు, ఉప్పు- పావుచెంచా, మామిడికాయ పిందె ఒకటి. కావాల్సినంత పరిమాణానికి తగ్గట్టుగా పదార్థాలు తీసుకోవాలి.

తయారీ విధానం.. ముందుగా చింతపండు 45నిమిషాల పాటు నానబెట్టి గుజ్జును తీసుకోవాలి. ఒక వేళ చింతపండు అందుబాటులో లేకపోతే నిమ్మకాయని ఉపయోగించొచ్చు. వగరు కోసం మామిడికాయ పిందెను తీసుకొని చెక్కు తీసి సన్నగా తరగాలి. వేపపూత కాడల నుంచి వేరుచేసి తెల్లగా ఉండే పూరెబ్బలను మాత్రమే తీసుకోవాలి. ఒక వేళ వేపపూత అందుబాటులో లేకపోతే నానబెట్టిన మెంతులు, మెంతుల పొడి కూడా వాడొచ్చు. ఒక గిన్నెలో చింతపండు గుజ్జు, మనకి కావాల్సినంత పరిమాణంలో మంచినీళ్లు పోయాలి. దాంట్లో బెల్లం, కారం, ఉప్పు, మామిడికాయ ముక్కలు వేసి బాగా కలపాలి. బెల్లం లేకపోతే దీనికి బదులు చెరకు రసం, కారానికి బదులు పచ్చిమిర్చి కానీ, మిరియాలు కానీ ఉపయోగించొచ్చు. అంతే ఎంతో రుచికరమైన తెలుగువారి ఉగాది పచ్చడి తయారైపోయింది.