అదరహో.. అప్పటికప్పుడు పచ్చళ్లు

బీట్‌రూట్‌తో..

కావల్సినవి: బీట్‌రూట్‌- ఒకటి, ఉప్పు- తగినంత, కారం- అరకప్పు, ఆవపిండి- పావుకప్పు, నిమ్మరసం- ఆరుచెంచాలు, పసుపూ, నూనె- కప్పు, ఆవాలు- అరచెంచా, ఎండుమిర్చి- రెండు.
తయారీ: బీట్‌రూట్‌ని చిన్నముక్కలుగా తరిగి అందులో నిమ్మరసం కలిపి పక్కనపెట్టుకోవాలి. ఇప్పుడు బాణలిలో నూనె వేడిచేసి ఆవాలూ, ఎండుమిర్చీ వేయించి పొయ్యి కట్టేయాలి. అందులోనే తగినంత ఉప్పూ, కారం, ఆవపిండీ వేసి నిమిషం అయ్యాక ఈ తాలింపునంతా బీట్‌రూట్‌ ముక్కలకు కలిపితే చాలు.

క్యాబేజీతో..

కావల్సినవి: క్యాబేజీ- చిన్న ముక్క, ఉప్పు- తగినంత, కారం- నాలుగు చెంచాలు, వెనిగర్‌- రెండు చెంచాలు, ఆవపిండి- మూడు చెంచాలు, ఆవాలు - అరచెంచా, ఎండుమిర్చీ - నాలుగు, వెల్లుల్లి రెబ్బలు - రెండు, పల్లీనూనె- కప్పు.
తయారీ: క్యాబేజీని సన్నగా తరిగి వెనిగర్‌ కలిపి పెట్టుకోవాలి. ఒక గిన్నెలో ఉప్పూ, కారం, నూనె, ఆవపిండి కలపాలి. ఇందులో వెల్లుల్లి తరుగు వేయాలి. వెనిగర్‌లో క్యాబేజీ వూరిన తర్వాత ఇందులో కలపాలి. దీనిపై ఆవాలూ, ఎండుమిర్చితో తాలింపు వేస్తే ఆ వేడికి క్యాబేజీ బాగా మగ్గి మంచి రుచి వస్తుంది. ఇష్టమైన వారు పల్లీలు కూడా వేసుకోవచ్చు.

దొండకాయతో..

  కావల్సినవి: దొండకాయలు- ఎనిమిది, ఉప్పు- రెండు చెంచాలు, కారం- నాలుగు చెంచాలు, ఆవపిండి- రెండు చెంచాలు, పల్లీనూనె- పావుకప్పు, నిమ్మరసం- నాలుగు చెంచాలు, పసుపూ - పావుచెంచా, ఆవాలు - అరచెంచా, ఎండు మిర్చి- రెండు, మెంతిపిండి- పావుచెంచా.
తయారీ: దొండకాయల్ని చిన్నముక్కలుగా తరిగి పసుపూ, నిమ్మరసం పట్టించి పక్కన పెట్టుకోవాలి. ఓ గిన్నెలో తగినంత ఉప్పూ, కారం, ఆవపిండీ, మెంతుపిండీ, ముప్పావువంతు నూనె వేసి అన్నింటినీ బాగా కలిపి పెట్టుకోవాలి. ఇందులో దొండకాయ ముక్కలు వేసి బాగా కలపాలి. ఇప్పుడు మిగిలిన నూనెను వేడిచేసి ఆవాలూ, ఎండుమిర్చి వేయించి పచ్చడిపై వెయ్యాలి. ఇష్టమైన వాళ్లు ఆ తాలింపులో వెల్లుల్లీ వేసుకోవచ్చు.

కూరగాయలతో..

  కావల్సినవి: క్యారెట్‌, క్యాప్సికం, ఉల్లిపాయ - ఒక్కోటి చొప్పున, క్యాబేజీ తరుగు - రెండు పెద్ద చెంచాలు, పచ్చిమిర్చి - ఐదు, వెల్లుల్లి తరుగు - పెద్ద చెంచా, ఆవనూనె - పావుకప్పు, ఉప్పు- తగినంత, ఆవపిండి - రెండు చెంచాలు, ఎండుమిర్చి - మూడు, నిమ్మకాయ - ఒకటి, ఆవాలు - చెంచా.
తయారీ: క్యారెట్‌, క్యాప్సికం, ఉల్లిపాయని సన్నగా తరిగి ఈ ముక్కలకు క్యాబేజీ కూడా కలపాలి. వీటిపై ఆవపిండీ, తగినంత ఉప్పూ వేసి మరోసారి కలపాలి. తరవాత నిలువుగా తరిగిన పచ్చిమిర్చి ముక్కలు వేయాలి. ఇప్పుడు బాణలిలో నూనె వేడిచేసి ఆవాలూ, ఎండుమిర్చీ, వెల్లుల్లి ముక్కలు వేయించి.. ఈ కూరముక్కలపై వేయాలి. చివరగా నిమ్మరసం కలిపితే చాలు. ఇందులో పచ్చిమిర్చి వేస్తాం కాబట్టి కారం అవసరంలేదు.

క్యాలీఫ్లవర్‌తో...

కావల్సినవి: క్యాలీఫ్లవర్‌ పువ్వులు - కప్పు, ఉప్పు- తగినంత, కారం- నాలుగు చెంచాలు, ఆవపిండి- చెంచా, నిమ్మరసం- రెండు చెంచాలు, నువ్వుల నూనె- అరగ్లాసు, మెంతి పిండి - చెంచా, ఇంగువ, పసుపు - చిటికెడు చొప్పున.
తయారీ: ఒక పాత్రలో క్యాలీఫ్లవర్‌ పువ్వులు తప్ప మిగిలిన పదార్థాలన్నీ తీసుకుని అన్నింటినీ బాగా కలపాలి. తరవాత కడిగి తడి పూర్తిగా ఆరిన క్యాలీఫ్లవర్‌ పువ్వులు వేయాలి. ఇందులో ఇంగువ ఉంటుంది కాబట్టి.. అదనంగా తాలింపు వేయాల్సిన అవసరంలేదు.