వానాకాలం ఆకాకర తిందాం

ఆకాకరకాయ కూర

తయారుచేసే విధానం
* ఆకాకర కాయల్ని ముక్కలుగా కోయాలి. తరవాత ఉప్పు చల్లి ఓ గంట నాననివ్వాలి. తరవాత ముక్కల్ని పిండేసి పక్కన ఉంచాలి.
* నాన్‌స్టిక్‌ పాన్‌లో 2 టేబుల్‌స్పూన్ల నూనె వేసి ముక్కల్ని వేయించి తీయాలి. విడిగా ఓ బాణలిలో దనియాలు, ఎండుమిర్చి వేయించి తీయాలి. వీటికి కొబ్బరి తురుము, చింతపండు, తగినన్ని నీళ్లు, ఉప్పు జోడించి మిక్సీలో వేసి మెత్తగా రుబ్బాలి.
* బాణలిలో నూనె వేసి కాగాక ఉల్లిముక్కలు వేసి వేయించాలి. తరవాత రుబ్బిన ముద్ద వేసి మంచి వాసన వచ్చేవరకూ వేగనివ్వాలి. ఇప్పుడు వేయించి తీసిన ఆకాకర కాయ ముక్కలు వేసి కాసేపు వేయించి తీయాలి.

ఆకాకర వేపుడు

తయారుచేసే విధానం
* ఆకాకర కాయల్ని పలుచని చిప్స్‌లా కోయాలి. సేమ్యాని మిక్సీలో వేసి పొడి చేయాలి. ఓ గిన్నెలో బియ్యప్పిండి, సేమ్యా పొడి, ఉప్పు, కారం అన్నీ వేసి కలపాలి. ఇప్పుడు ఈ మిశ్రమంలో ముక్కలు వేసి బాగా కలిపి కాగిన నూనెలో వేయించి తీస్తే కరకరలాడుతూ రుచిగా ఉంటాయి. వీటిని స్నాక్స్‌లానూ తినొచ్చు.

ఆకాకర పాలకూర

తయారుచేసే విధానం
* ఆకాకరకాయల్ని పలుచని చక్రాల్లా కోయాలి.
* బాణలిలో నూనె పోసి కాగాక ముక్కలు వేసి ఉప్పు, పసుపు వేసి కలిపి సిమ్‌లో మూతపెట్టి కాసేపు ఉడికించి ముక్కల్ని విడిగా తీయాలి. తరవాత అందులోనే అల్లం ముద్ద వేసి వేయించాలి. అది బాగా వేగాక వేయించిన ముక్కలు వేసి, పాలు పోసి మూతపెట్టి సిమ్‌లో ఉడికించాలి. ముక్కలు పూర్తిగా ఉడికి, కూర దగ్గరగా అయ్యాక దించాలి.

ఆకాకర-టొమాటో కర్రీ

తయారుచేసే విధానం
* నాన్‌స్టిక్‌పాన్‌లో నూనె వేసి కాగాక, ఉల్లి, పచ్చిమిర్చి ముక్కలు వేసి వేయించాలి. అవి వేగాక అల్లం వెల్లుల్లి కూడా వేసి ఓ నిమిషం వేయించాలి. తరవాత టొమాటో ముక్కలు, కరివేపాకు వేసి ఓ రెండు నిమిషాలు మగ్గనివ్వాలి. ఇప్పుడు ఆకాకర కాయ ముక్కలు వేసి ఓ నిమిషం తిప్పిన తరవాత ఉప్పు, కారం, దనియాలపొడి చల్లి రెండు నిమిషాలు వేయించాలి. 
* తరవాత తగినన్ని నీళ్లు పోసి మూతపెట్టి, సిమ్‌లో ఉడికించాలి. ముక్కలు ఉడికి, కూర దగ్గరగా అయిన తరవాత కొత్తిమీర తురుము చల్లి దించాలి.

కొబ్బరి మసాలాతో ఆకాకర 

తయారుచేసే విధానం
* ఆకాకర కాయ ముక్కలకు ఉప్పు పట్టించి, పావుగంట పక్కన ఉంచాలి. తరవాత ముక్కల్లో నుంచి నీళ్లు పిండేసి వాటిమీద టీస్పూను నూనె వేసి ఉంచాలి.
* బాణలిలో నూనె వేసి కాగాక ముక్కల్ని వేయించి తీయాలి.
* పాన్‌లో అరటీస్పూను నూనె వేసి కాగాక ఎండుమిర్చి వేసి వేయించాలి. తరవాత అల్లం ముక్కలు కూడా వేయించి తీయాలి. వీటికి కొబ్బరి తురుము, చింతపండు, ఆవాలు చేర్చి రుబ్బాలి.
* నాన్‌స్టిక్‌ పాన్‌లో నూనె వేసి కాగాక రుబ్బిన ముద్ద వేసి వేయించాలి. తరవాత తగినన్ని నీళ్లు పోసి మిశ్రమాన్ని గ్రేవీలా ఉడికించాలి. ఇప్పుడు వేయించిన ముక్కలు వేసి మరికాసేపు ఉడికించి, కొత్తిమీర తురుము చల్లి దించాలి.