మసాలా మిర్చి... మస్తుగుంటది..!

రాజస్థానీ మలై మిర్చి

తయారుచేసే విధానం
* మిర్చి కడిగి తడి లేకుండా ఆరనివ్వాలి. తరవాత కాడలు తీసేసి చిన్న ముక్కల్లా కోయాలి. బాణలిలో నూనె వేసి కాగాక పచ్చిమిర్చి ముక్కలు వేయించి తీయాలి. తరవాత ఇంగువ, జీలకర్ర, పసుపు, దనియాలపొడి, మెంతిపొడి వేసి కలిపి తిప్పాలి. ఇప్పుడు వేయించిన పచ్చిమిర్చి ముక్కలు వేసి బాగా కలపాలి. ఉప్పు, ఆమ్‌చూర్‌ పొడి కూడా వేసి కలిపి మూతపెట్టి ముక్కల్ని సిమ్‌లో రెండు నిమిషాలు ఉడికించాలి. తరవాత ముక్కల్ని కదుపుతూ మీగడ వేసి కలిపి ఓ నిమిషం ఉడికించి దించాలి. నోరూరించే ఈ మీగడ మిర్చిని అన్నంలో కలుపుకుని తింటే ఎంతో రుచిగా ఉంటుంది. ఫ్రిజ్‌లో పెట్టుకుంటే వారం రోజుల వరకూ నిల్వ ఉంటుంది.

హైదరాబాదీ మిర్చి కా సాలన్‌

తయారుచేసే విధానం
* జీడిపప్పు, నువ్వులు విడివిడిగా సుమారు పావుగంటసేపు నీళ్లలో నానబెట్టి వీటికి కొబ్బరి, కొద్దిగా నీళ్లు చేర్చి పేస్టులా రుబ్బాలి. ఇందులోనే దనియాలపొడి, కారం, పసుపు, కొద్దిగా ఉప్పు కూడా వేసి కలపాలి. పచ్చిమిర్చిని చీల్చి వాటిల్లో మసాలా ముద్ద పెట్టాలి. ఇలాగే అన్నీ చేయాలి. నాన్‌స్టిక్‌ పాన్‌లో మూడు టేబుల్‌స్పూన్ల నూనె వేసి కాగాక స్టఫ్‌ చేసి మిర్చి వేసి వేయించి తీయాలి. జీలకర్ర, ఆవాలు వేసి వేగాక చింతపండు గుజ్జు, మిగిలిన మసాలా ముద్ద వేసి కలపాలి. దనియాలపొడి ఒకటిన్నర కప్పుల నీళ్లు పోసి మరిగించాలి. మంట తగ్గించి, వేయించిన మిర్చి వేసి మూత పెట్టి రెండు నిమిషాలు ఉడికించి దించాలి.

గుజరాతీ స్టఫ్‌డ్‌ మిర్చి

తయారుచేసే విధానం
* పచ్చిమిర్చిని శుభ్రంగా కడిగి కొద్దిగా తొడిమ ఉంచాలి. పచ్చిమిర్చిని చీల్చి అందులోని గింజల్ని తీసేసి కొద్దిగా ఉప్పుని పచ్చిమిర్చి లోపల రుద్దాలి.
* పల్లీలు, కొబ్బరి తురుము మిక్సీలో వేసి మెత్తగా రుబ్బాలి. అందులోనే సెనగపిండి, నిమ్మరసం, సోంపుగింజలపొడి, దనియాలపొడి, కారం, ఉల్లిముక్కలు, ఉప్పు వేసి కలపాలి. ఈ మిశ్రమాన్ని మిర్చిలో స్టఫ్‌ చేయాలి. తరవాత నాన్‌స్టిక్‌ పాన్‌లో నూనె వేసి జీలకర్ర, ఇంగువ వేసి వేగాక స్టఫ్‌ చేసిన మిర్చి వేసి, మిగిలిన స్టఫ్‌ని కూడా వేసేసి ఐదు నిమిషాలు వేయించాలి. తరవాత మూతపెట్టి సిమ్‌లో ఉంచి ఉడికించాలి. అవి పూర్తిగా ఉడికిన తరవాత వీటిని అన్నంలో నంజుకునో లేదా నేరుగానూ కూడా తినొచ్చు.

సిమ్లా మిర్చి కా ఆలూ

తయారుచేసే విధానం
* ఉల్లిపాయల్ని నిలువుగా కోయాలి. సిమ్లా మిర్చిని కూడా పెద్ద ముక్కల్లా కోయాలి. బంగాళాదుంపలకి కూడా తొక్కు తీసి ముక్కల్లా కోయాలి.
* బాణలిలో 2 టేబుల్‌స్పూన్ల నూనె వేసి కాగాక ఉల్లిముక్కలు వేసి వేయించి తీయాలి. అదే బాణలిలో మిర్చి ముక్కలు కూడా వేసి వేయించి తీయాలి. తరవాత బంగాళాదుంప ముక్కలు కూడా వేసి వేయించి తీయాలి.
* ఇప్పుడు బాణలిలో మిగిలిన నూనె వేసి కాగాక ఆవాలు వేసి వేయించాలి. తరవాత అల్లంవెల్లుల్లి ముద్ద వేసి వేగాక దనియాల పొడి, కారం, పసుపు, ఉప్పు వేసి కలపాలి. ఇప్పుడు టొమాటో గుజ్జు వేసి కలుపుతూ నూనె బయటకు వచ్చేవరకూ ఉడికించాలి. తరవాత సోయా సాస్‌ వేసి కలిపి వేయించిన ఉల్లి, సిమ్లా మిర్చి, బంగాళాదుంప ముక్కలు వేసి తగినన్ని నీళ్లు పోసి మూత పెట్టి ఉడికించాలి. ముక్కలన్నీ మెత్తగా ఉడికి దగ్గరగా అయ్యాక తీసి కొత్తిమీర తురుము చల్లితే సరి.