ఈ వంటలతో పొట్టకి హాయి!

కాలీఫ్లవర్‌ మెంతి గ్రేవీ

తయారుచేసే విధానం
* నాన్‌స్టిక్‌ పాన్‌లో టీస్పూను నూనె వేసి ఉల్లిముక్కలు, పచ్చిమిర్చి, అల్లంవెల్లుల్లి, కొబ్బరితురుము వేసి వేయించాలి. ఇవి చల్లారిన తరవాత మిక్సీలో వేసి మెత్తగా రుబ్బాలి. తరవాత మరిగించిన పాలు పోసి కలపాలి.
* కాలీఫ్లవర్‌, మెంతికూర, క్యారెట్‌ ముక్కలు కుక్కర్‌లో పెట్టి ఉడికించి తీయాలి. అదే బాణలిలో మిగిలిన నూనె వేసి జీలకర్ర వేసి వేగాక ఉల్లి మిశ్రమం వేసి రెండు నిమిషాలు వేయించాలి. తరవాత ఉడికించిన కూరగాయ ముక్కలు, మెంతి ఆకు వేసి, ఉప్పు వేసి మూతపెట్టి మరో నాలుగు నిమిషాలపాటు సిమ్‌లో ఉడికించి దించాలి.

గ్రీన్‌ కిచిడీ

తయారుచేసే విధానం
కొర్రలు, పెసరపప్పు విడివిడిగా సుమారు ఐదు గంటలపాటు నాననివ్వాలి.
* ప్రెషర్‌పాన్‌లో నానబెట్టిన కొర్రలు, పప్పు, తాజా బఠాణీలు, ఉప్పు, ఓ కప్పు నీళ్లు పోసి ఐదు విజిల్స్‌ వచ్చే వరకూ ఉడికించాలి.
* నాన్‌స్టిక్‌పాన్‌లో నెయ్యి వేసి జీలకర్ర వేసి వేగాక ఇంగువ, అల్లం, వెల్లుల్లి ముద్ద కూడా వేసి వేయించాలి. ఇప్పుడు ఉల్లి, పచ్చిమిర్చి ముక్కలు వేసి వేగాక టొమాటోముక్కలు, పసుపు, కారం వేసి సిమ్‌లో ఉడికించాలి. తరవాత టొమాటో మెత్తగా అయ్యేలా మెదిపి, ఉడికించిన కొర్రల మిశ్రమం వేసి మరో రెండు నిమిషాలు సిమ్‌లో తిప్పుతూ ఉడికించి దించాలి.

(గమనిక: కొర్రలకు బదులు దంపుడుబియ్యం, సజ్జలు, సామలు, అరికెలు... ఏవయినా వాడుకోవచ్చు).

కీరా- మొలకల సబ్జి

తయారుచేసే విధానం
బాణలిలో నూనె వేసి వేగాక జీలకర్ర, ఇంగువ వేసి వేయించాలి. తరవాత మొలకలు, పసుపు వేసి ఓ కప్పు నీళ్లు పోసి మూత పెట్టి మీడియం మంట మీద పది నిమిషాలు ఉడికించాలి. తరవాత కీరాముక్కలు, కారం, దనియాలపొడి, జీలకర్రపొడి, ఉప్పు వేసి అవసరమైతే మరికాసిని నీళ్లు పోసి మూత పెట్టి సిమ్‌లో మొలకలన్నీ ఉడికేవరకూ ఉంచాలి. చివరగా కాస్త కొత్తిమీర తురుము చల్లి దించితే సరి.

ఆలూ-మునక్కాయ కూర

తయారుచేసే విధానం
* నాన్‌స్టిక్‌ పాన్‌లో మునక్కాడ ముక్కలు, బంగాళాదుంపలు, బెల్లం తురుము, ఉప్పు, తగినన్ని నీళ్లు పోసి ఉడికించాలి.
* గ్రేవీ కోసం తీసుకున్న టొమాటోలు ఓ ఐదు నిమిషాలు ఉడికించి చల్లారాక మెత్తగా రుబ్బాలి.
* కొబ్బరితురుము, జీలకర్ర, ఎండుమిర్చి, దనియాలు, వెల్లుల్లి అన్నీ వేసి రుబ్బాలి.
* విడిగా మరో పాన్‌లో నూనె వేసి మినప్పప్పు, ఆవాలు, కరివేపాకు, పసుపు వేసి వేగాక ఉడికించిన కూరగాయల ముక్కలన్నీ వేసి కలపాలి. ఇప్పుడు రుబ్బిన టొమాటోముద్ద, కొబ్బరి మిశ్రమం కూడా వేసి బాగా కలిపి కూరగాయముక్కల్ని ఉడికించిన నీళ్లు కూడా పోసి సిమ్‌లో ఓ పది నిమిషాలు ఉంచి దించాలి.