కొబ్బరి నీళ్లు తాగాలంటే... బండి దగ్గరకు వెళ్లాలి. లేదంటే మార్కెట్‌లో ప్లాస్టిక్‌ బాటిళ్లలోనూ, టెట్రాప్యాకెట్లలోనూ అందుబాటులో ఉన్నవి తాగాలి. అయితే ఎక్కువ రోజులు నిల్వ ఉండేలా ఆ నీళ్లని ప్రాసెస్‌ చేస్తారు. అందుకే చాలామంది తాజా కొబ్బరిబొండాం నీళ్లనే తాగడానికి ఇష్టపడుతుంటారు. మరి ప్రతిసారీ స్టాల్‌కెళ్లి బొండాలు తెచ్చుకోవడం కుదరకపోవచ్చు. అందుకని థాయ్‌లాండ్‌లోని కొబ్బరిబొండాలు అమ్మే రైతులు- బొండాల చుట్టూ తొక్కతీసి వాటికి ప్లాస్టిక్‌పోర్ట్‌, స్ట్రాపెట్టి... సీల్‌ వేసి రెడీ టు డ్రింక్‌ పేరుతో మార్కెట్‌లోకి తెస్తున్నారు. ఒక్కో బొండాన్ని సుమారు రూ.600కి అమ్ముతున్నారు. ఒక బాక్సులో నాలుగైదు పెట్టి సూపర్‌మార్కెట్లలో అందుబాటులో ఉంచుతున్నారు. సరికొత్త ప్యాక్‌ రూపంలో వస్తున్న ఈ తరహా కొబ్బరిబొండాలను తీసుకుంటే ఎప్పుడు కావాలంటే అప్పుడు... ఎక్కడ కావాలంటే అక్కడ తాజాగా కొబ్బరి నీరుతాగే అవకాశం ఉంటుంది.