వదులైన ఉంగరం కోసం!

ప్రియమైనవారు సర్‌ప్రైజ్‌గా తీసుకొచ్చిన డైమండ్‌ రింగో, బంధువులు ప్రేమగా కొన్న బంగారు ఉంగరమో... కాస్త వదులుగా ఉందంటే ఏం చేస్తాం.. వేలికి పెట్టుకుంటే జారిపడిపోతుందని పక్కన పెట్టేస్తుంటాం. కానీ ఓ చిన్న వస్తువుతో అలాంటి సమస్యకూ ఇట్టే చెక్‌ పెట్టేయొచ్చు. ‘రింగ్‌ సైజ్‌ అడ్జెస్టర్‌’ పేరుతో వచ్చిన ఈ వస్తువు- వదులుగా ఉన్న ఉంగరాన్ని సరిగ్గా వేలికి సరిపోయేలా చేస్తుంది. పారదర్శకమైన ప్లాస్టిక్‌లా ఉండే ఈ అడ్జెస్టర్‌... బంగారూ, వెండీ రంగుల్లోనూ దొరుకుతోంది. వీటిల్లో మన రింగ్‌కు సరిపోయే వాటిని కొనుక్కోవచ్చు. ఉంగరం కిందవైపు వీటిని (ఫొటోలో ఉన్నట్టుగా) చుట్టేశామంటే... ఇటు చూడ్డానికీ అంత ఇబ్బందిగానూ ఉండదు, అటు ఉంగరమూ పడిపోకుండా ఉంటుంది.