బీపీ ఒకసారి వచ్చిన తరవాత దాన్ని నియంత్రణలో ఉంచుకోవాలంటే రోజూ ట్యాబ్లెట్‌ తప్పనిసరి. అయితే ఆస్ట్రేలియాలోని మోనాష్‌ యూనివర్సిటీ స్కూల్‌ ఆఫ్‌ బయోలాజికల్‌ సైన్సెస్‌కు చెందిన పరిశోధకులు- జన్యు మార్పిడి చేసిన పీచు పదార్థంతో తయారైన సప్లిమెంట్లను వాడటం ద్వారా బీపీని తగ్గించవచ్చు అంటున్నారు. ప్రస్తుతం వాడుకలో ఉన్న మందుల్లానే ఈ పీచు పదార్థం కూడా పనిచేస్తుందనీ, మూడు వారాల్లోనే బీపీని అదుపులోకి తీసుకువస్తుందనీ చెబుతున్నారు. సాధారణంగా పొట్టలోని బ్యాక్టీరియాలో మార్పులు రావడం వల్లే అనేక వ్యాధులు వస్తాయి. పరిశోధకులు ఆ బ్యాక్టీరియాను నిశితంగా పరిశీలించినప్పుడు- అది ఉత్పత్తి చేసే ఎసిటేట్‌, బ్యుటిరేట్‌ అనే రెండు రకాల షార్ట్‌- చెయిన్‌ ఫ్యాటీ ఆమ్లాల సంఖ్య తగ్గడంవల్లే బీపీ వ్యాధి బారినపడుతున్నట్లు గుర్తించారు. అంటే- ఆ ఫ్యాటీ ఆమ్లాల సంఖ్యను ఉత్పత్తి చేసే బ్యాక్టీరియా పెరగాలన్నమాట. అందుకే జన్యుసాంకేతిక పరిజ్ఞానంతో  ఈ రెండు రకాల ఆమ్లాల శాతం పెరిగే మొక్కజొన్నను రూపొందించారు. ఆ గింజల పొడితోనే సప్లిమెంట్లను తయారుచేసి మూడు వారాలపాటు రోగులకు ఇచ్చినప్పుడు- వాళ్ల పొట్టలోని బ్యాక్టీరియాలో మార్పు వచ్చిందట. తద్వారా ఎసిటేట్‌, బ్యుటిరేట్‌ ఆమ్లాలు ఎక్కువగా ఉత్పత్తి కావడంతో వాళ్లలో బీపీ అదుపులోకి వచ్చిందట. సో, మున్ముందు సప్లిమెంట్లతోనే బీపీనీ తగ్గించుకోవచ్చన్నమాట.