వేడివేడి అన్నం... దాంతోపాటూ కూర, పులుసు, పచ్చడి, వేపుడు, పెరుగు, సాంబారు, స్వీటు లేదా జ్యూసు- ఏ రకంగా చూసినా ఓ మంచి శాకాహార విందు భోజనం అది! అంతటి రుచికరమైన విందును దారినపోయేవారికోసం ఉచితంగా ఏర్పాటు చేస్తోంది చెన్నైలోని ట్యాబ్లెట్స్‌ ఇండియా ఫౌండేషన్‌. అన్నదానం కదాని... ఏదో ఆషామాషీగా చేయరిక్కడ. వచ్చినవాళ్ళని సాదరంగా ఆహ్వానిస్తారు. టేబుళ్ల ఎదుట కూర్చోబెట్టి మినరల్‌ వాటర్‌ ఉంచుతారు. చక్కగా అరిటాకేసి భోజనం వడ్డిస్తారు. భోజనానికి వచ్చేవాళ్ళ పట్ల చికాకూ, చిన్నచూపు వంటివేమీ ప్రదర్శించకుండా- పరిసరాల శుభ్రతనూ, వ్యక్తిగత పరిశుభ్రతనూ పక్కాగా పాటించేలా అక్కడి సిబ్బందికి తర్ఫీదునిచ్చారు. రోజూ మధ్యాహ్నం పన్నెండు నుంచి మూడుగంటల దాకా ఈ కేంద్రాల్ని తెరిచి ఉంచుతారు. పేదవాళ్ల సంఖ్య కాస్త ఎక్కువగా ఉండే తండయార్‌పేట, సామియార్‌ మఠం, ఎంకేబీ నగర్‌, ప్రముఖ పర్యటక ప్రాంతం మహాబలిపురంలోనూ, పాండిచ్చేరిలోనూ- ఈ అన్నదాన కేంద్రాల ద్వారా రోజుకి 4000 మంది ఆకలి తీర్చుతోంది ట్యాబ్లెట్స్‌ ఇండియా ఫౌండేషన్‌.