‘చేపా చేపా ఎందుకు ఎండలేదూ అంటే... గడ్డిమోపు అడ్డమొచ్చిందీ...’ వంటి కథలు అక్కడ వినిపించవు. ఎండేలా ఎండబెడితే ఎలాంటి చేపయినా ఎండి తీరాల్సిందే అంటారు కోలి తెగ వాసులు. ముంబైలో వాళ్లు నివసించే కోలి వాడలకు- ముఖ్యంగా వెర్సోవా బీచ్‌ వైపు వెళితే... అంతస్తులవారీగా కట్టిన వెదురు గుంజలూ వాటికి పరదాల్లా వేలాడుతున్న చేపలూ కనిపిస్తాయి. కోలి ప్రజలు ఓర్పుగా నేర్పుగా కర్రలకి చేపల్ని కట్టే పద్ధతే ఎంతో చిత్రంగా ఉంటుంది. ఒక చేప నోట్లో మరో చేప తలని దూర్చి, కర్రకి అటొకటీ ఇటొకటీ వచ్చేలా వేలాడదీస్తుంటారు. ఆ చేపలు మూడునాలుగురోజుల్లో ఆసాంతం ఎండి, ఎంతకాలమైనా నిల్వ ఉంటాయి. చేపల్ని పట్టడం, వాటిని అమ్మడమే ప్రధాన వృత్తిగా చేసుకున్న కోలి తెగ ప్రజలకు చేపలన్నా చేపలతో చేసే రకరకాల వంటకాలన్నా మహా ఇష్టం. అందులోనూ ఈల్‌ చేపల మాదిరిగా ఉండే బాంబే డక్‌ లేదా బాంబిల్‌ చేపలంటే మరీనట. అందుకే వేసవిలో పట్టిన ఈ రకం చేపల్ని జాగ్రత్తగా ఎండబెట్టి నిల్వచేసుకుంటారట. వర్షాకాలంలో సముద్రంలోకి వెళ్లరు కాబట్టి అవసరం మేరకు ఇంట్లో ఉంచుకుని మిగిలినవి మార్కెట్‌కు తరలిస్తారట... చేప రుచి లేందే వాళ్లకి ముద్ద దిగదు మరి!