పెళ్లి సమయంలో ప్రత్యేకంగా ఎంపిక చేసుకునే వాటిలో ఆహ్వాన పత్రిక ఒకటి. పెళ్లి తేదీ వరకే దాని ప్రాధాన్యం తప్ప తరవాత ఎవరూ దాన్ని పట్టించుకోరు. అయితే తమ పెళ్లి కార్డును అలా పక్కన పడేయకుండా ఎప్పటికీ ఓ సమాచార నిధిలా దాచుకోవాలని ఆశపడ్డారు గుజరాత్‌కి చెందిన సవలియా- ధార. క్రైమ్‌ సెల్‌లో కానిస్టేబుల్‌గా పనిచేస్తున్న సవలియా, కమాండ్‌ అండ్‌ కంట్రోల్‌ సెంటర్‌లో కానిస్టేబుల్‌గా విధులు నిర్వహిస్తున్న ధార ప్రేమించుకున్నారు. త్వరలోనే పెళ్లి పీటలు ఎక్కనున్న ఈ జంట తమ బంధువులకు సైబర్‌ క్రైమ్‌ గురించి అవగాహన కల్పించాలనుకున్నారు. అందుకే తమ పెళ్లి పత్రికలో- ఆహ్వానంతోపాటు ‘సైబర్‌ సమస్యలు- పరిష్కారాలు’ పేరుతో ఇరవై ఏడు పేజీల బుక్‌లెట్‌ను ప్రచురించారు. సైబర్‌ కేటుగాళ్లకు అవకాశమివ్వకుండా ఎలాంటి జాగ్రత్తలు తీసుకోవాలీ; మొబైల్‌, ల్యాప్‌టాప్‌, సోషల్‌ మీడియాలో గోప్యత కోసం ఎలాంటి సెట్టింగులు పెట్టుకోవాలీ; ఏ ఆప్‌ల జోలికి వెళ్లకూడదు; బాధితులకోసం ఉన్నచట్టాలేంటీ; సంప్రదించాల్సిన హెల్ప్‌లైన్‌ నంబర్లు... తదితర సమాచారంతో కార్డును ప్రింట్‌ చేయించారు. ‘అదిరిపోయే రిటర్న్‌ గిఫ్టు ఇచ్చారు’ అంటూ బంధువులూ, ఉన్నతంగా ఆలోచించారని అధికారులూ వారిని పొగడ్తల్లో ముంచేస్తున్నారు మరి.