సహజంగానే విమానాల పట్ల చిన్నారులు ఇట్టే ఆకర్షితులవుతారు. అందుకే ఓ వయసొచ్చాక కెరీర్‌ను నిర్దేశించుకోవాల్సిన చిన్నారులకు బ్రిటన్‌లోని కార్న్‌ఫీల్డ్‌ యూనివర్సిటీ ముందుగానే లక్ష్యాన్ని ఏర్పరిచే పనిలో పడింది. అందుకు కారణం అక్కడి విమానయాన సంస్థలు ఉద్యోగుల కొరతను ఎదుర్కోవడమే. విమాన డిజైనింగ్‌, తయారీ, విడిభాగాల పరిశ్రమల్లో పనిచేసేవారి సంఖ్య తగ్గిపోవడంతో కార్న్‌ఫీల్డ్‌ యూనివర్సిటీ- బెన్‌మత్‌ విమానాశ్రయంలో నేషనల్‌ ఫ్లయింగ్‌ సెంటర్‌ను ఏర్పాటు చేసి- ఓ విమానాన్ని తరగతి గదిలా మార్చేసింది. అక్కడికొచ్చే పాఠశాల స్థాయి విద్యార్థులకు విమానాల గురించి అవగాహన కల్పిస్తూ... ఆ రంగంలోని ఉద్యోగావకాశాలను పరిచయం చేస్తూ వారిలో విమానయాన రంగం పట్ల ఆసక్తిని రేకెత్తిస్తున్నారు నిపుణులు. పిల్లల్ని ఆకాశంలో విహరింపజేస్తూ పాఠాలు చెబుతున్న ఎయిర్‌లైన్స్‌ ఉద్యోగులు చిన్నారులకు సరికొత్త అనుభూతిని కలిగిస్తూ కొత్త ప్రపంచానికి తీసుకెళుతున్నారు. ఆ రంగంలోకి రావాలనుకుంటున్న వారికి పాఠశాల స్థాయి నుంచే శిక్షణ ఇవ్వడానికి ఏర్పాట్లు చేశారు. ఆలోచన బాగుంది కదూ.