పశ్చిమ్‌ బంగలోని డార్జిలింగ్‌ జిల్లాలో ఓ మారుమూల గ్రామం నిచ్‌బారీ. సౌకర్యాలకు ఆమడ దూరంలో ఉన్న ఆ పల్లెని ఒకప్పుడు ఎవరూ పట్టించుకునేవారు కాదు. ఇప్పుడు మింటూ రాయ్‌ అనే సామాన్యుడి కల వల్ల అది వార్తల్లో నిలిచింది. చిన్నప్పుడు కోల్‌కతాలో టైటానిక్‌ షిప్‌ ఆకారంలో నిర్మించిన దుర్గామాత మండపాన్ని చూసిన మింటూ- ఎప్పటికైనా ఆ ఓడలాంటి ఇంటిని కట్టుకోవాలని అనుకున్నాడు. కొన్నాళ్లకి డబ్బు కూడబెట్టుకుని ఇంజినీర్లను అడిగితే.. పిచ్చోణ్ని చూసినట్లు చూశారట. ఎంతమందిని అడిగినా ఫలితం లేకపోవడంతో సొంతంగా డిజైన్‌ చేసుకుని, భార్యతో కలిసి తనే తన కలల సౌధాన్ని నిర్మించుకుంటున్నాడు. షిప్‌ మాదిరిగా మూడంతస్తుల ఇంటి నిర్మాణాన్ని 2010లో ప్రారంభించాడు. 39 అడుగుల పొడవు, 13 అడుగుల వెడల్పు, 30 అడుగుల ఎత్తుండే ఆ ఇంటి పనులు పూర్తికావొచ్చాయి. దాంతో ఆ టైటానిక్‌ ఇంటిని చూడటానికి చుట్టుపక్కలవారితోపాటు, కోల్‌కతా నుంచి కూడా సందర్శకులు రావడం విశేషం.