కారులో సీటు బెల్టు ఉంటుంది. ఎక్కాక దాన్ని పెట్టుకునే వరకూ ఆటోమేటిక్‌ సంకేతాలు వస్తూనే ఉంటాయి. అదే ఆటో ఎక్కితే ‘సీట్‌ బెల్టు పెట్టుకోండి’ అని డ్రైవర్‌ చెబితే ఆశ్చర్యమేస్తుంది కదూ. ప్రయాణికుల క్షేమాన్ని దృష్టిలో పెట్టుకుని రాపిడో సంస్థ ఆటోల్లోనూ సీటు బెల్టు తప్పనిసరి చేసింది. ఆటోలో ప్రయాణికుల సీటుకు రెండు వైపులా ఓపెన్‌ ఉంటుంది. పెద్ద పెద్ద గోతులు వచ్చినప్పుడూ, సడెన్‌ బ్రేకులు వేసినప్పుడూ, అనుకోని ప్రమాదాలు జరిగినప్పుడు- ముందుకు రావడం, పక్కకు పడిపోవడం జరుగుతుంది. నిత్యం జరిగే రోడ్డు ప్రమాదాలను దృష్టిలో పెట్టుకుని రాపిడో సంస్థ బెంగళూరులోని ఆటోలకు సీట్‌బెల్టులను ఏర్పాటుచేస్తోంది. అందుకు సంబంధించిన ధరా భారాన్ని డ్రైవర్లపైన వేయకుండా ఆ సంస్థే భరిస్తోంది. త్వరలో మిగతా నగరాల్లోనూ ఈ సీటు బెల్టులు అమల్లోకి వస్తాయట.