ఆ బ్యాక్టీరియాకి అదే కవచం!

పొట్టభాగంలోని బ్యాక్టీరియా మందులకు లొంగకపోవడానికిగల కారణాల్ని గుర్తించారు శాస్త్రవేత్తలు. ఇవి యాంటీబయోటిక్స్‌ నుంచి రక్షించుకోవడానికి కణబాహ్యంగా ఎఫ్‌-పైలై అనే కవచాన్ని ఏర్పాటుచేసుకుంటాయి. వీటిద్వారా బ్యాక్టీరియాలు సంఘటితమై మందుల్ని ఎదుర్కొనేందుకు అవసరమైన జన్యువుల్ని మార్పిడిచేసుకుంటాయి. పొట్టలో అసాధారణ పరిస్థితులు, వేడి, ఆమ్లాలు వంటివి ఎఫ్‌-పైలైని విచ్ఛిన్నం చేసి బ్యాక్టీరియాల్లో జన్యు మార్పిడిని ఆపగలవని భావించేవారు. అయితే, ఆ కఠిన పరిస్థితుల్లోనూ జన్యువుల్ని మార్పిడి చేసుకుంటాయనీ తద్వారా అతిపెద్ద బ్యాక్టీరియా సమూహంగా ఏర్పడి యాంటీ బయోటిక్స్‌తో పోరాడతాయనీ ఇంపీరియల్‌ కాలేజ్‌ లండన్‌ పరిశోధకులు తేల్చారు. ఇ-కొలీ బ్యాక్టీరియాలో పైలై కవచాన్ని విచ్ఛిన్నం చేసే లక్ష్యంతో అవి ఉన్నచోట తీవ్ర అలజడి సృష్టించారు. ఆ అలజడికి బ్యాక్టీరియాల మధ్య జన్యు మార్పిడి మరింత పెరిగి వాటి కవచాలు సాగుతూ, స్ప్రింగ్‌లాంటి నిర్మాణంలోకి మారాయట. కవచం వెనక రహస్యం తెలిసింది కాబట్టి దాన్ని విచ్ఛిన్నం చేసే మార్గం తెలుసుకోవచ్చంటున్నారు శాస్త్రవేత్తలు.