వయసులో ఉన్నప్పుడు ఎవరికైనా సంబంధ బాంధవ్యాలు అనేకం ఉంటాయి. అంటే- కుటుంబీకులూ బంధువులూ స్నేహితులూ సహచరులూ... ఇలా ఎందరో ఉంటారు. అయితే వృద్ధాప్యం సమీపించేకొద్దీ కుటుంబీకులూ దగ్గరి బంధువులూ చిరకాల స్నేహితులతోనే ఎక్కువగా గడిపేందుకు ఇష్టపడతారు. తెలియకుండానే పరిధి తగ్గిపోతుంటుంది. మనుషుల్లోని ఈ రకమైన సంబంధాలు పరిణామక్రమంలో భాగంగా కోతులనుంచే వచ్చి ఉంటాయని భావిస్తున్నారు ఎలెక్సర్‌, అరిజోనా స్టేట్‌ యూనివర్సిటీ నిపుణులు. ఎందుకంటే- సుమారు రెండు వందల మెకాకే కోతుల్ని పదేళ్లపాటు నిశితంగా పరిశీలించినప్పుడు- ప్రత్యేకించి ఆడకోతులు- వయసుమీద పడే కొద్దీ అన్నింటితో కలవడం తగ్గించి కుటుంబంతోనూ చిరకాలం నుంచీ స్నేహంగా మెలిగే కోతులతోనే ఎక్కువ సమయం గడపసాగాయట. అంటే- వయసుని బట్టి సామాజిక బంధాల ప్రాధాన్యాలు మారుతుంటాయని చెబుతున్నారు. చిన్న వయసులో సామాజికంగా ఎంతమంది ఉంటే అంత లాభం. కానీ వయసు వచ్చే కొద్దీ ఆ సంఖ్యను తగ్గించుకోవడంవల్ల వ్యాధుల సంక్రమణ తగ్గుతుంది. కొత్త పరిచయాలు తగ్గడంతో మెదడుకి మరీ పని చెప్పాల్సిన అవసరం ఉండదు. ఆ రకంగా అవి ఆరోగ్యంగా ఉంటున్నట్లు గుర్తించారు. దీని ఆధారంగా వృద్ధాప్యంలో చుట్టూ వందమంది లేకున్నా ఆత్మీయులైనవాళ్లు నలుగురు ఉన్నా వాళ్లు హాయిగా జీవించగలరన్నది నిపుణుల అభిప్రాయం.