ముందే ఊహించి...

ఓసారి భార్య తన భర్త ఫోన్‌ను చెక్‌ చేసింది. కాంటాక్ట్స్‌లో మిగతావన్నీ పేర్లతో ఉంటే ఒకటి మాత్రం ‘మై లైఫ్‌’ అని ఉంది. తన అనుమానం నిజమైందని తిట్టుకుంటూ చూస్తే అది తన నెంబరే. అయ్యయ్యో ఎంత అపార్థం చేసుకున్నానూ అనుకుని బాధపడుతూ భర్త మీద ఎంతో ప్రేమ చూపింది. అన్నిటికీ సర్దుకుపోతూ గొడవ పడటమే మానేసింది. పాపం ఆమెకేం తెలుసు... రోజుకు పది కాల్స్‌ వెళ్లిన బాస్‌ పేరుతో ఉన్నదే ఆమె అనుమానించిన నెంబరని.

చూసినా ఆగలేదు!

భార్య: ఏమండీ పాలు పొంగకుండా చూడమన్నాను చూశారా...

వెంగళప్ప: చూశానోయ్‌. కానీ అదేంటో కన్ను ఆర్పకుండా చూసినా పొంగిపోయాయ్‌, ఎందుకలా?

అసలు ఎలా?

జడ్జి: నువ్వు మీ ఆవిడని భయపెట్టి, బెదిరించి చాలా కంట్రోల్‌లో పెట్టావంట... నిజమేనా?

సుబ్బారావు: సర్‌...అసలేం జరిగిందంటే...

జడ్జి: సంజాయిషీలు వద్దు. ఏం చెప్పి భయపెట్టావో చెప్పు చాలు.

బద్ధకం పోయింది

సుబ్బారావు: ఆ డాక్టర్‌ నిజంగా దేవుడే.. మా ఆవిడ బద్ధకాన్ని చిటికెలో పోగొట్టాడు తెలుసా...

ముత్యాలరావు: ఎలా?

సుబ్బారావు: వయసు పెరుగుతోంది కదమ్మా... అన్నాడంతే. ఆ మర్నాటి నుంచి అన్ని పనులు తనే చకచకా చేసేస్తోంది.  

అందుకే తాగాను

భార్య: కారణం లేకుండా తాగనన్నారు... మరి ఇవాళ ఏ కారణంతో తాగి వచ్చారు.

భర్త: దీపావళి వస్తోంది కదా... అందుకే తాగాను.

భార్య: పండగకీ.. మీరు తాగడానికీ సంబంధం ఏంటో...

భర్త: పిల్లలు రాకెట్‌ కాల్చడానికి సీసా కావాలి కదా... అందుకని.